絲絲講場：股神最欣賞邊4位CEO？

比亞迪王傳福榜上有名

能夠獲得股神欣賞，以上4位CEO究竟有咩過人之處。首先亞馬遜貝索斯目前為居世界首富，身家拋離股神老友微軟蓋茨超過300億美元。巴菲特形容，貝索斯嘅管理才能令佢驚嘆，並且話自己係貝索斯嘅鐵粉添。「貝索斯能夠看到未來，看到一個行業會如何被顛覆。」

Apple庫克與股神嘅關係，從巴郡披露入股Apple講起，資料稱巴郡擁1.67億股Apple股票，價值約282億美元，而巴郡持倉成本約210億美元，帳賺72億美元，Apple更係巴郡嘅第二大重倉股。對於庫克，巴菲特話佢把Apple管理得好。

至於比亞迪王傳福，股神話當年係聽取拍檔芒格建議買入比亞迪，今日證明沒買錯。巴菲特並指：「王傳福有非常多偉大嘅想法，而且佢亦擅長將呢啲想法變為現實。」而截至去年底，巴郡持有2.25億股比亞迪股票，持倉成本2.32億美元，現時價值已達19.6億美元。

巴菲特形容精密機件嘅多尼根係非凡嘅生意人，熱愛製造業。佢一直勤懇地工作，建立了非常卓越嘅公司。正因股神對多尼根刮目相看，喺一五年八月，巴郡宣布斥372億美元收購精密機件公司。

余絲韻