絲絲講場：Tesla馬斯克博袋四千億

電動車生產商特斯拉（Tesla）行政總裁馬斯克目光遠大，家陣連Tesla同佢新訂立嘅薪酬方案都咁遠大，長達成十年，佢嘅薪酬將同Tesla嘅市值同財務表現掛鈎，如果全部達標，佢隨時淨袋558億美元（約4,352億港元）！

新薪酬方案分十二階段，馬斯克要取得每個階段嘅期權，有兩樣嘢要達標，分別係市值同收入或盈利。舉個例，如果要拎走首階段期權，Tesla市值要達1,000億美元，同時收入達200億美元或者除稅息折舊前盈利達15億美元。

要攻陷所有階段，Tesla市值要達6,500億美元，幾乎睇齊亞馬遜現時市值！馬斯克屆時所獲期權行使價值達558億美元，到時佢持股比例將升至28%，值約1,840億美元。

但Tesla周二收市市值只係約595億美元！仲有喺未達到任何階段前，馬斯克一個仙都唔會有！不過，摩根士丹利就話，個薪酬方案似宣傳伎倆多。

余絲韻