Market Insight：中資金融股輪流發力

睇呢幾日形勢，恒指回吐過百點就要買，而且下午三點前好完成，否則歐資一掃貨又搶貴咗。仲有，呢期興逢收市競價時段嚟挾個全日高位收市，昨日主板成交更達到1,979億元，可見班芬佬真係堅買貨。所以點都好，認為自己賺夠唔想揸貨，都千祈咪做淡友。

跟炒勿忘控制風險

呢期人仔強而美元弱，但美國聯儲局將會加息同縮表，到底美元食錯咩藥？人仔又憑乜嘢持續強勢？這些都是淡友看不明的，可這卻是鐵一般的事實。似乎「侵侵」政府會力控美元同債息在一定範圍內，且別小覷美國長期吸金能力。

人仔匯率尚未完全開放，但資產價格不斷隨匯率上升，不利競爭力之餘，亦等同繼續吹大泡沫，後續發展如何？也許不是今年，就是明年會有答案。當然，呢一刻大市炒到火紅火熱，有智慧不如趁勢亦有道理。總之大家記得，呢啲人山人海的大時代，跟勢炒無錯係無可厚非，但最緊要係風險管理不能鬆懈，要妥善控制槓桿水平，有心理準備應對突如其來的大風浪。

滬綜指唔聲唔聲經已去番3,500點樓上，於3,800至4,000點肯定係一個阻力唔細的大位，係咪六月A股入摩前可以一試，古勝都冇水晶球，但至少喺季內，A股繼續穩步向上的概率仍大，兩地金融股可以繼續睇好。

見到昨日北水數據，資金力吸建行、騰訊及中國銀行（03988），睇落其實券商股真係落後，但見到昨日中信證券（06030）居然逆市微跌，海通證券（06837）亦僅微升收場。再睇番幅走勢圖，其實兩隻股由上月低位上嚟升咗唔少，中信證券更突破咗一五年末季以來的阻力，當啲資金集中火力掃內銀的時候，信證抖抖氣都好正常，想買貨就要把握時機。

中金潛在利好因素

另外，值得一提的還有中金公司（03908），騰訊已入股成中金第三大股東，相信有助加強在零售的覆蓋，有助推動其證券經紀、資產管理及孖展業務。事實上，隨着A股入摩，未來將有更多國際投資產品覆蓋A股，股市交投趨活躍，預計中金今年整體投資收益率預測有上調空間。

另外，仲未計及中金公司喺前年買入的中投證券，若然嚟緊證券業真係有景，點計都係利好。還有一點市場未係太留意的，乃中金亦有條件成為H股全流通試業企業。故橫睇豎睇，呢隻都應該係券商股的股膽之列。

古勝