絲絲講場：港情侶關係差樓作怪？

保誠保險一項調查顯示，如果100分係滿分，香港嘅人際關係滿意度只係得64分，喺進行訪問嘅亞洲市場中排名倒數第二，僅僅高過中國內地，排名頭三位分別係柬埔寨、越南同菲律賓。點解香港得分會咁差？其中一個原因係居住問題導致兩性關係緊張。

23%為生活安排嘈交

調查顯示，41%成年人視置業為重要的財務目標，有關比例喺未婚情侶當中更高，佔逾五成。居住問題更加係導致兩性關係緊張嘅原因，23%受訪者透露試過同伴侶就生活安排發生爭執，同父母住嘅已婚人士比例就更高。

半數成人屬「夾心世代」

報告又話，半數香港成年人為「夾心世代」，唔止要負責父母同子女嘅生活開支，又冇期望自己老咗，仔女會為佢哋提供同等方式或程度的財務支援。

其實香港人咁愁都係錢作怪，有87%受訪者預期老咗，就要依賴個人積蓄同資產去維持生活開支，其中91%香港人就話好擔心，話如果自己支持唔到家庭財政，家人就會面對經濟困難。

余絲韻