孖妹S檔案：倫敦直擊 百億基金經理 全方位教抗逆

（歐洲）實業值博 慎防美股風暴

Rayon：施羅德歐洲股票基金經理 Lionel Rayon

彩兒：講Shopping當然歐洲先係最Pro，講股票，你隻基金揸住超過110億元嘅資產，大把子彈！但出年係金融海嘯十周年，會唔會有危險？

Rayon：要視乎歐美幣策及主要經濟體系嘅債務問題。我哋唔係神，只可提醒大家，應要未雨綢繆，今年多咗美國嘅投資者投資歐股，因美股表現好，有唔少人沽貨獲利，然後將資金轉移到歐洲市場，準備定美股風暴隨時來臨。

Kitty：今年歐洲股市都升得唔錯，主要原因係咩？

Rayon：歐洲股票升市主要都係因為量寬，呢三年主要國家都一齊升，特別係今年全球經濟的確好咗，歐洲公司業績都比前幾年有盈利增長。

Kitty：美股今年升得多，但估值太貴，歐股似乎平好多。

Rayon：你咁講就唔啱啦！美國同歐洲做嘅嘢係唔一樣，美股主要係科技行業做得好，人人都淨係識睇嗰幾隻估值大嘅科網股，其實好多板塊都落後。歐洲就係做實業嘅比較多，主要做零售、食品、汽車，做啲美國冇咁強嘅嘢，每個國家都有佢哋嘅強項o架嘛。

全球主要股市表現

施羅德Lionel Rayon表示，今年多了美國投資者投資歐股。

避開食品零售及銀行股

Kitty：若我想投資歐股，應該留意邊啲公司？

Rayon：歐洲公司愈嚟愈國際化，好似汽車咁，寶馬嘅主要銷售已經喺中國，其他零售品牌依家都唔會淨係做本土市場，會去其他國家開分店，特別係亞洲地區。你應該留意吓國際品牌。

彩兒：我唔太熟歐洲股市，教吓我點揀啦！

Rayon：等我講吓有咩你要避免，就係要避免投資食品零售股，因近幾年歐洲嘅超級市場集團收入增長唔係太好，即使今年有某幾間超市錄盈利增長，但市場競爭始終太大，種類繁多，又愈來愈多平價超級市場出現，令到傳統中價超市受威脅，長遠嚟睇，呢個行業發展唔係好健康。

仲有銀行股都要小心，銀行股股價今年走勢強勁，美國量寬政策即將屆滿，市場分析貨幣政策短期內難以鬆綁，再者，加息步伐加快，我估計銀行股出年可能都要跌一跌。

汽車與奢侈品牌諗得過

Kitty：講到咁灰，咁我買咩好？

Rayon：買番啲貼身少少嘅股，例如汽車股，汽車銷售由一五年開始，銷售數字每年漸增，特別係德國同埋法國，始終車喺外國係必需品。你哋兩位可買女仔最鍾意嘅名牌股，奢侈零售品牌係增長緊嘅行業，好多人送禮物都會送名牌。

彩兒：我都發現今年香港啲名店多番人排隊，特別係Gucci，自從佢換咗個設計師後，啲款靚咗好多，遲啲去買個新袋還是買隻歐股基金好呢？

Rayon：你嘅觀察力真係唔錯，Gucci係法國開雲集團（Kering）旗下品牌，今年第三季收入大增28.4%，全靠營業額高咗差唔多一半既Gucci，真係「On fire」呀！

（新興市場）面臨挑戰 恐受累強美元

Wilson：施羅德新興市場股票主管 Tom Wilson

彩兒：可以總結一下今年新興市場表現嗎？

Wilson：新興市場最近幾年表現唔錯，因主要經濟體復甦，同埋全球貿易回升，帶動新興市場出口。美匯喺特朗普贏咗總統選舉後急升，主要係市場預期特朗普會推出好多新嘅政策去刺激經濟，但事實又唔係咁，隨着市場憧憬落空，加上歐元又反彈，導致美元受壓，今年新興市場就受惠於美匯疲弱，帶動環球嘅資金流入。

Kitty：MSCI新興市場指數今年表現佳，升咗三成，出年仲會唔會升咁多？

Wilson：我保持樂觀，因全球多個主要經濟體仍在復甦，故新興國家嘅企業出口量亦都會增加。

彩兒：下年就係金融海嘯十周年，會唔會有咩突如其來嘅風險？

Wilson：市場擔心若聯儲局真係進一步收緊幣策，就會令新興市場有好大挑戰。另一個風險就係，美元突然變得太強，會令通脹有壓力，新興市場都會受壓，呢啲都係投資者要注意嘅地方。若美元升勢持續，投資者都要諗吓係咪要調整自己嘅投資組合。

施羅德Tom Wilson對於明年的港股及A股維持中性看法。

施羅德Mark Callender表示，愈來愈多亞洲投資者進行物業跨境投資。

內地消費股看高一線

Kitty：A股「入摩」都講咗幾年，內地A股終於喺明年正式「入摩」。你又點睇？

Wilson：依家市場已預期會有大量外國資金流入A股市場，納入後會令外資更容易入A股，我哋依家對A股都有興趣，嚟緊會不斷搵投資機會。

彩兒：有冇咩板塊你特別睇好？

Wilson：主要都係內地消費類股份，同時亦都對金融、保險及能源股維持增持評級。

Kitty：港股同A股今年累積升幅可觀，仲有冇水位？

Wilson：港股同A股今年都升咗唔小，我對於明年維持中性睇法。反而我幾睇好韓股，因南韓嘅出口復甦已超出市場預期，由上年十一月到依家，出口總值已連續升十個月，新政府亦有推出新財政政策，制訂11萬億韓圜補貼，相信能刺激當地經濟增長，唯一擔心係地緣政治問題。

（樓市）本港樓價貴 海外客卻步

Callender：施羅德房地產研究主管 Mark Callender

Kitty：施羅德早前就房地產投資發表全球十大城市排行榜，解構邊個城市值得投資。我最近見股市好，諗緊賣股換樓，有咩地方值得投資？

彩兒：等我話你知，原來美國洛杉磯排第一，其次就係英國倫敦，香港排第六，澳洲墨爾本排第八，新加坡同上海就分別排第九同第十。

Kitty：原來美國有5個城市上咗榜，睇嚟我要去美國投資！等我再問下專家先。

Callender：講起海外物業投資，真係愈來愈多亞洲投資者跨境投資，特別由一六年開始，全球投資者當中，亞太地區嘅跨境投資交易佔比由約27%急升至一七年嘅40%，贏咗北美洲做一哥！北美洲嘅佔比一向係No.1，佔全球超過一半，依家被亞洲超前。

倫敦寫字樓叫價料下調

Kitty：香港又點呢，成日見海外發展商嚟香港推銷樓盤，真係咁多人買？

Callender：唔好睇小香港，雖然地方細，但購買力極強，年內首二十大成交額中，香港佔咗三個。今年香港人最愛買美國樓，按上述名單，交易額足足共有288億元，但最明顯變化係今年多咗三倍來自香港嘅資金買加拿大物業！相反，可能全世界嘅人都知香港樓價貴，所以今年海外投資者去香港買樓嘅資金減少。

Kitty：英國脫歐程序進行中，脫歐對樓市嘅影響有幾大？

Callender：英國脫歐對倫敦嘅寫字樓市場產生最大影響，因為銀行同其他金融服務企業會將部分嘅業務轉移至歐盟，其實，今年已經有好多大型機構宣布要將總部撤離英國，所以預計出年倫敦嘅寫字樓二手供應會增加，叫價亦會有調整。

記者黃頌雅倫敦報道

Kitty、彩兒