Market Insight：地產股難突破悶局

本地地產股反彈之勢曇花一現，上周五新鴻基地產（00016）及新世界發展（00017）股價都已縮番轉頭。除了是遇着大跌市之外，拆息抽升，按息追加相信係遲早發生。當然，本地薑股價跟唔到樓價升，已經唔係今日至知，大落後除咗中資盲搶地，本地老字號難以補充土儲被邊緣化外，亦都早已將息口因素反映得七七八八，相信年底至明年初，本地地產股繼續橫行悶局的機會相當大。

近期網上熱話，前財經事務及庫務局局長陳家強，上半年叫市民要留意樓市風險，近日轉頭花三千幾萬元以首置身份入市掃貨，今天的我打倒昨天的我，陳家強自然遭網民群起揶揄。

睇番金融海嘯以來，政府年年狼來了，美國加息，樓市泡沫講到口都臭，可憐係樓市升到唔識停，本來有能力買都變無能力，真係信者失救。

香港無人口政策，資金人口自由進出，內地近14億人即使得0.1%有錢佬想走資或落嚟買嘢，已講緊約140萬單位需求，多過香港樓市115個私樓單位總存量。口講乜都得，身體最誠實，入市不過話畀港人知，疊埋心水做無殼一族吧！

融創蟹貨多籮籮

儘管本地大銀行未即時追加最優惠利率，套息影響下，港元一個月期拆息已升穿1.1厘，再創九年新高。

眼見美股升到滯滯哋，水緊因素即時草木皆兵，上周五恒指開低後完全彈唔起，插穿埋10日線28,814點先肯停，最終跌318點報28,848點。有融創中國（01918）批股上板，主板成交增至1,264億元。更早受水緊拖累的A股，彈一日又散過，滬綜指跌26點報3,266點，3,300點鐵底變鐵頂，上唔返去講乜都假。

融創伸手，以每股31.1元配售2.515億股，集資78億元。上周五即市落過31.35元，收市跌10.6%報31.55元，算係無穿過批股價，接貨芬佬肯食胡，都有粒糖贏吓，喺風高浪急環境，都算叻仔。

不過，呢一口收市價乃融創自九月二十六日以來最低，期間股價在30.65至43.55元之間上落，11.9%大折讓一批，差不多近三個月以來入市的買家都要坐艇，高位追的輸緊兩成七。

如果本周初彈唔起，大家就要小心，上面蟹貨多籮籮，仲有今轉批股的投降盤，篤穿埋31.1元，睇怕短期想有運行都難。

利豐焗住轉型求變

利豐（00494）宣布以11億美元（約85.36億港元）作價，出售家具、美容和毛衣產品業務予主要股東馮氏控股及弘毅投資合組的公司，準備之後派特別股息每股0.476元，繼今年八月中期業績勝預期之後，股價半年內爆「第二棍」，抽升8.5%收4.43元，是逾一年半新高，利豐預告，交易會為今年產生一次過非現金商譽損失6.1億美元。

不敵互聯網潮流

大買辦利豐，曾是海外企業進入中國採購價廉物美貨品的重要橋樑，可惜百年老字號不敵科技世界的轉變。互聯網普及，今時今日海外買家用手指篤兩篤電腦，已經有齊產品報價及賣家資料。

今次壯士斷臂之後，利豐未來轉型數碼化會唔會成功，古勝無水晶球，而睇得利豐比較樂觀的滙豐證券的預測，一八年預測市盈率12.7倍（已計入上周五升幅），未算好貴，目標價畀4.6元。如果搶息前回返回4.15至4.3之間，可以小注一試。

古勝