Market Insight：內地水緊 港股冇運行

大媽食胡或累街坊

過去兩日A股走勢都算肉酸，兩支大陰燭，滬綜指昨日跌27點收報3,402點。由十月份中國出口、全國發電量增幅、零售及固定資產投資增幅等多項數據全部肥佬不及市場預期，兼且十月傳統樓市旺季，住宅銷售卻見到近三年來最大跌幅，統統都並非吉兆。

臨近年尾，內地資金開始緊張，十年期國債孳息率三年以來首次返回4厘樓上。中央唔放水，堅決執行樓市調控，社會金融去槓桿，一七年呢最後個半月，恐怕A股都幾難捱。

論走勢，滬綜指不宜跌穿十月橫行市的頂部3,400點，否則支持變阻力。對於愈來愈受A股左右的港股，要小心大媽食胡累街坊。

騰訊有力再破頂

千呼萬喚，騰訊第三季賺180億元人仔，按年升69%，營業額652.1億元人仔升61%，前者是預測中上限水平，後者更在預測之上，季績公布後，在歐洲市急彈見388.8元，將昨日港股時段失地一次過收復。

上兩次季績騰訊挾瓜晒啲淡友，今次學精咗，季績前沽空明顯比前收斂，沽空佔比由周二21%縮番落6.3%，是三周最低。走勢上，騰訊唔把握機會破四舊水勢係假，而今次成績表夠唔夠做？不妨留意急不及待未等成績表出籠搶先出報告，睇450元的瑞銀，騰訊第三季收入及non-GAAP純利都仲要較大好友瑞銀估得更高，唔使等今朝啲報告，斷估短期破頂機會唔細。

至於超購560倍、有騰訊概念的易鑫，昨日暗盤一開升逾四成，無畀雷蛇雷聲大雨點小的走勢拖累，加埋騰訊靚爆季績，睇怕今朝11元樓上有機會食到胡。

燃氣股炒作提防短癮

港股調整，呢期熱炒的板塊普遍回吐，資金轉攻落後板塊如燃氣股。華潤燃氣（01193）昨日一度飆上29.2元，中國燃氣（00384）曾高見24.65元，新奧能源（02688）及港華燃氣（01083）均逆市高收。不過，古勝相信資金只是短暫停留避險，唔會留得長，所以高追不必。

近日國際油價再度回落，「三桶油」出現較大沽壓，中石油（00857）及中國海洋石油（00883）昨日股價同跌約3%，中石化（00386）則跌逾2%。

三桶油中，中海油股價表現與油價走勢敏感度最高，其次係中石油，而相對較平均兼經營上下游業務的中石化，敏感度為三者中最低。若想睇住油價炒三桶油，就要留意呢個因素。

古勝