孖妹S檔案：散戶專家齊齊講心得 抽新股4招贏盡
提提你哋，聽日萬聖節金多寶攪珠啦，頭獎係5,000萬元！不過，姊妹們都係發少啲白日夢啦，聽講中六合彩頭獎嘅機會率超過一千萬分之一。若想中個細獎，不如諗吓抽隻優質新股，機會率高好多。最近嘅新股眾安在綫（06060）同閱文集團（00772）都有好多捧場客，閱文更勢成今年凍資王。唔通新股就係寶，抽中就冇得輸？做慣小偵探嘅孖妹，一於幫股友研究吓新股究竟有幾筍，又點樣可以增加中獎機會？
林：國農證券董事總經理 林家亨
許：耀才證券行政總裁 許繹彬
陳：輝立証券（香港）經理 陳英傑
禤：散戶 禤生
彩兒：證券行好少可咁熱鬧，啲人排隊做咩？
Kitty：呢個情景似曾相識，記唔記得我哋之前潛入去新盤展銷廳，打晒蛇餅抽籤揀樓？
彩兒：你睇，有啲仲係一家大細過嚟，可能嚟抽獎啩。
許：冇錯，佢哋就係嚟「抽獎」，抽新股啊！
彩兒：新股唔係一人一手嘅咩？使乜抽？
許：當然唔係喇，如果多人爭，係會分唔勻。
彩兒：唉！抽新股同買新樓一樣，要有錢仲要有運氣。
許：股份嘅分配基準視乎有效認購新股申請數目而定。若超額認購，新上市公司就要運用回撥機制，從配售部分調配股份去公眾認購部分，但未必做到一人一手。
孖展及人海戰術助中籤
許：所以唔少散戶先要用孖展，放大槓桿，增加中籤機會同獲分配嘅手數。我哋間行就提供高達95%孖展，孖展息率更低至1%。
見閱文咁受歡迎，我哋仲加大咗孖展認購額至400億元。另外，頂頭槌飛暫已預留接近30張。
睇超購倍數知風險
彩兒：但係用孖展會唔會進取得滯？輸到入心入肺？
林：你講得啱！但透過公開發售用孖展抽新股，已比國際配售投資者用孖展抽嘅投資風險低，因為媒體會不斷Update推算公開發售嘅超額認購倍數，一般最終倍數亦同推算嘅唔會好大落差，所以用孖展抽新股風險有限。
相反，喺國際配售市場，資訊就冇咁透明，機構投資者或專業炒家亦可以隨時抽飛，所以國際配售嘅認購倍數隨時有變，令佢哋大失預算。
彩兒：我明！飽仲要夾硬食，係會嘔。
Kitty：我資金有限，咪只可以等食穀種？
許：未必。用人海戰術，借助屋企人嘅Quota抽，亦會易啲中，一家大細嚟分行開戶正因為咁。
禤：嘻嘻！我將自己大部分多餘錢都攞晒出嚟抽閱文，仲叫埋全家齊齊抽，希望中多幾手喇。
旺市利股價 閱文勝算高
彩兒：點解你咁大膽買重閱文？
禤：閱文呢啲優質新股，投資風險比較低。雖然預計佢冇騰訊控股（00700）咁勁，如果騰訊有八隻爪，閱文就應該得一隻爪，但身為騰訊嘅初生Baby，前途應該都唔錯，見騰訊股價自上市以嚟飆咁多，閱文股價都應該有強大上升動力啩，我打算長揸。
彩兒：點解選擇大注抽新股，而唔喺二手市場搵靚貨？
禤：恒指企喺28,000點，其實都幾高，我驚之後會跌，所以最近都冇加冇減港股，轉抽新股好過。
大時代近百公司上市
陳：個市旺係有利新股。一般如果新股超購多過一百倍，股價都會好快飆高。
彩兒：嘩！聽你講完，見到證券行咁墟冚，原來唔係單單羊群心理咁簡單。
Kitty：有冇啲歷史可以分享吓，新股市場喺繁榮盛世同滿目瘡痍時嘅分別？
彩兒：呢樣我知！○三年就係個好例子。○三年正值沙士，香港經濟雪上加霜，但到下半年，隨着疫情消退，加上內地人士獲准以「個人遊」方式來港旅遊，經濟明顯反彈。下半年亦帶動港股向上，令恒生指數全年升35%，十二月十五日觸及12,740點年內最高位。當第四季市況好咗，集資額多咗，亦見多番新股上市。
Kitty：一五年就係港股大時代，恒指曾觸及28,588點高位，新上市公司數目係咪特別多？
彩兒：一四及一五年，港股轉強，集資額飆高至9,290億元及10,940億元；新上市公司數目特別多，分別有96間及90間。事實上，由八六至一六年，恒指普遍向上，港股每年集資額都有上升趨勢。
基本面佳值博 淡市照賺
Kitty：咁講，淡市係咪要放棄抽新股？
林：未必！市淡，人棄我取，有時都係聰明決定。始終炒新股亦要分析股份基本因素。好似○五年東風集團股份（00489）上市，冇咩人抽，超購唔足一倍，因為中國去產能，市場睇淡汽車股，但我又唔覺得去產能對汽車股咁負面，最後我抽咗唔少添。（暗爽）東風定價1.6元，首日上市收報1.74元，爆升8.75%。
許：冇話旺市抽新股先賺得多，喺淡市都唔難有一兩成嘅利潤。況且市旺，認購人多咗，定價就貼上限定價；相反，市淡就貼下限定價。
陳：我都見過公司因市況差，被迫擱置上市計劃，但其實有啲都係優質股。
許：值唔值得抽，睇隻新股嘅背景、盈利增長及業務概念。
業務前景好 不妨長揸
彩兒：閱文近排咁Hit，實力如何？
林：佢搞緊網上閱讀平台，走在潮流尖端。20年前啲人去書局買書，依家就興喺網上睇書，所以佢屬開荒牛，會飲到頭啖湯。另相信中國投資者亦有興趣投資閱文。
林：再者就係名牌效應，母公司係騰訊，可以分享母公司過億用戶群。不過，呢個行業門檻唔高，隨時有好多競爭對手攤分個餅，惟有拭目以待。
彩兒：一般新股可以揸幾耐？
林：如果公司前景好，業務持續增長，不妨揸耐啲。騰訊○四年上市，如果揸到依家都未放，就會發咗，因為股價升咗幾百倍。
抽唔夠 暗盤交易幫到手
彩兒：我知耀才同輝立都有暗盤交易，用暗盤有咩好？
陳：暗盤交易時段係新股正式上市日前一個營業日下午4時15分至6時30分開放。暗盤交易剔除隔夜風險，同時如果自己抽唔夠貨，就可以喺暗盤買多啲。記住暗盤交易要有貨先沽得，零售或機構投資者亦可以參與。
林：如果暗盤價低過我預期聽日嘅開市價，咁我都會喺暗盤買。
預兩成資金 量力而為
林：要衡量自己嘅風險承受能力，亦唔建議瞓身！最多擺兩成資金玩新股好喇。
陳：呢排興科網股，你可以留意吓。眾安超額認購，亦帶起咗個氣氛。
Kitty：由一三年至今，資訊科技業平均市盈率維持逾30倍，持續拋離所有股份逾10倍之平均市盈率。
彩兒 Kitty
若有料報畀彩兒同Kitty或有嘢問，可電郵money.biz@on.cc