孖妹S檔案：股災月嚇傻？專家教避險

M：Cambria Investment Management首席投資官 Mebane Faber

4徵兆預示牛市就玩完

彩兒：見唔見到我頭頂有舊黑雲。

Kitty：唔止，仲飛過一隻黑天鵝添！（暗笑）

彩兒：我都聽過黑天鵝，即係估你唔到嘅事嘛。之前用嚟形容過英國脫歐、美國總統特朗普上場。

Kitty：仲有樣嘢叫橙天鵝，係笑緊特朗普嘅膚色，同特朗普危機有啲關係。

彩兒：Mebane，你係華爾街當時得令嘅人氣Fund Man，你一定會最快感應到！我最想知嚟緊股災可以有幾驚嚇，定還是只係我自己嚇自己？

M：睇番歷史就最客觀，○○年科網泡沫爆破幾個月後，納斯達克指數由5,132點跌至1,470點，好多美國科技公司都插水，包括Cisco嘅市值蒸發咗86%，亞馬遜股價亦由107美元跌至7美元。

彩兒：My God......

Cambria的Mebane Faber表示，目前的股市隨時會冧。	交銀香港羅家聰稱，香港樓市存在泡沫。	專業投資者Pasu稱，大型科網股如騰訊仍值得追。

股災指標全部響警

M：之後○八年金融海嘯，美國股票基金急插，標普500指數喺海嘯年就下跌咗大約38%；嗰陣資產擁有多過20萬美元嘅投資者普遍輸多過四分之一。

彩兒：咁究竟依家咒語有幾成真？

M：珍珠都冇咁真。呢個牛市好近岸，個市真係隨時冧！我平時用開4個Check住股災嘅指標都響緊警號，所以唔到你唔驚。

彩兒：我個心突然卜卜跳添。

M：第一，呢次美股牛市持續得太耐，係歷來第二次最長嘅牛市，喺○九年三月九日開始，到依家成8年幾啦。其實牛市平均壽命係4.5年。

Kitty：我Feel到嗰種無力感，好似啱啱跑完21公里馬拉松，你叫我再跑多一次，會好想死。

M：第二，美股估值過高。有個叫Buffett Valuation（巴菲特估值）嘅指標，係將美股總市值除以美國GDP，今年年中個指標係1.3，已經超出1呢個臨界點，咁代表美股估值早已過高，冇實體經濟支持，出現咗泡沫。○八年爆發金融海嘯之前，個指標最高都只係觸及過1.1。

Kitty：巴菲特指標認真值得深思啊，搞到我個心都離一離。

M：第三，都係同巴菲特有關。佢有句名言......

Kitty： 「別人貪婪時我恐懼，別人恐懼時我貪婪」

M： 聰明！依家股民瘋狂入市嘅景象，可以話係8年難得一見。歷史都話你知，個市經歷完巔峰後，翌年標普500指數表現都會差啲。

第四，個市靜得恐怖。VIX恐慌指數反映未來30日市場預期標普500指數嘅波動程度，20就係平靜同恐慌市場嘅分界線，但依家指數徘徊喺10，實在太低。

彩兒： 大師，按你講嘅「病徵」，情況好危急，可唔可以幫我嘅投資組合配過晒啲藥，增強我嘅抵抗力呀？

四大部署助強化組合

M：首先，唔好再擺錢入去呢個熱辣辣、隨時爆煲嘅股市！第二，唔好All-in股票，留20%或以上現金傍身。第三，唔好限死自己投資美國市場，應該發掘較低估值的海外股票，同時分散投資喺各類資產，包括債、樓及商品等。第四，善用投資工具，例如買認沽期權去對沖股票風險。

攞歷年美股表現最差嘅10個月睇，包括喺八七年十月股災，標普500指數、外國股票及房地產信託基金都跌逾11%。相反，投資美國10年期及30年期國債、國際金價平均都仲有約0.7至0.8%的正回報。

羅：交通銀行香港分行首席經濟及策略師 羅家聰

亞洲樓泡危 恐累股市

Kitty：你係港版末日博士，依家股市最大風險係咩？

羅：相信係由地產同債務問題觸發亞洲樓市爆破！○九年到依家成9年，香港樓市都冇咩點跌過之餘，仲炒到好貴，但又用唔到供求解釋，所以係有泡沫。股樓互為一體，樓市一爆，股樓都可能跌四至六成，咪話唔甘。

但以短線嚟講，港股似係膠着狀態，唔係升得好急，所以我預期佢唔會跌得太急。

買盈富收息勝定存

Kitty：點解係亞洲而唔係歐洲？

羅：○八年美國因次級房貸危機觸發金融海嘯，一二年到歐債危機，照計今次跌市源頭輪到亞洲。過去咁多年嘅QE（量化寬鬆）谷起亞洲樓市，因為歐美開始收水，歐美自己冇樓市泡沫，相反亞洲就有，情況就好似某人開大冷氣，好彩自己體質好冇病倒，但就害到其他體質弱嘅人。

我建議長Hold指數基金，如盈富基金（02800）收息，好過擺定期或放租收息。

P：專業投資者 Pasu

未必股災 美朝難打仗

彩兒：美股同港股飆得咁勁，但原來出現咁多陰霾，「萬聖節指標」又話十月可以入市，玩人咩？

P：我又唔太悲觀！出現股災嘅機會應該幾細。牛市連升幾年好常見，始終呢個股市係有最近強勁嘅經濟數據支持，唔係假嘅，所以將來回調都唔會太急。

中國對於全球GDP貢獻大，其經濟增長快速，其他國家亦自然受惠。例如最近日本股市飆升，或多或少都同出口中國嘅高科技零部件銷情理想有關。

之前中國經濟唔穩定，貪腐問題嚴重，跟住就見內地積極打貪，政治基礎穩固咗，國家應會健康發展；同埋近期公布嘅經濟數據都幾強勁，只要美國同朝鮮唔爆發戰爭，全球股市急跌機會就好微。依家港股仍處慢牛，我估之後會先回調5%。

彩兒：即係唔會有黑天鵝？美朝局勢唔得人驚？

P：話明黑天鵝，我點會估到。不過，你擔心嘅美朝局勢，又唔係你想像中咁壞。其實，特朗普同北韓金仔癲極有個譜。例如金仔為平壤新城市剪綵，實牙實齒話要令國家繁盛偉大，如果佢即將要同美國打仗，做咩仲要大費周章搞好個國家呢？同樣，我亦相信特朗普係理智嘅人。

彩兒：你頭先話有回調，最快會係幾時？

P：依家最Hit係十九大主題，但講嘅嘢仍流於空談，所以唔排除一開完會，股市會即刻跌。

股仔風險高 或跌得甘

Kitty：咁咩板塊最危？

P：細價股投資風險高啲，一旦回調，跌得最甘。我唔睇好內房股，中國恒大（03333）同融創中國（01918）今年升咗好多，最怕高處不勝寒；若內地仲要打壓樓市，內房股就冇運行。

如騰訊控股（00700）同阿里巴巴就最穩陣！佢哋基本面好，預計仲有好多高科技公司都會被佢哋收購，包括經營電訊、手遊、電動車及新能源汽車股等，進一步鞏固其科網壟斷地位。

彩兒：呢啲大型科網股仲值得追？

P：依家「鬧市」加牛市格局，我建議逢低吸納，但要縮細注碼，增加靈活性。真係唔知呢個牛市會幾長命。穩陣起見，投資者亦可以諗留一半Cash。

萬聖節指標比較冬夏回報

所謂嘅「萬聖節指標」（Halloween Indicator），意指如果將一年分成兩半，分別係夏季（每年嘅五至十月）同冬季（每年嘅十一月至翌年四月），從經驗得知，喺冬季嘅投資回報率一般明顯高過夏季，所以就根據呢個講法，美國俚語「Sell in May and Go Away」，投資者應喺五月沽貨，直至十月尾萬聖節結束，就可入番貨。

彩兒 Kitty