絲絲講場：中銀珍藏版紀念鈔點炒？

限量388套 底價5千蚊

早前中銀香港推出咗500萬張百年華誕紀念鈔票，並從中精心挑選咗一啲靚冧巴嘅，組成今次呢批「慈善珍藏版」，今次嘅「慈善珍藏版」一共七款（單鈔三款、3連張兩款、30連張兩款），加埋只係得388套。

想申請？今次要競投，要喺分行或網頁攞表格，填完交回畀中銀香港。講明係價高者得，同價就抽籤，收益扣除成本後全捐作本地慈善用途。

每套均附一張重2g嘅999足金「銀紙」！

中銀紀念鈔競投時間表

今次「慈善珍藏版」紀念鈔包括無英文冠字、冠字AA、BC及HK，不同款嘅分別主要係冧巴靚嘅程度。

其中一款「單鈔銅鑽珍藏版」，競投底價為5,000蚊，出114套，入場門檻最低。至於最罕嘅就非「整版30連張鑽石珍藏版」莫屬，得19套，競投底價6萬元！

專家：有錢人玩意

不過最特別係，呢批紀念鈔每套均附一張淨重兩克嘅999足金金頁，除卻冇冧巴，設計與Size同張紀念鈔一樣，名副其實係「金鈔票」！

呢批有冇得炒？錢幣專家梁裕棋話，睇怕都係「有錢人玩意」，佢估呢批冧巴十分罕有，大部分人買嚟收藏多，好少人會放同炒。錢幣專家梁陳榮輝睇法差不多，認為呢批嘅炒風都唔會點熾熱，因為入場費實在太貴！

余絲韻