Market Insight：新能源股持貨要耐性

內地走計劃經濟，凡事並非市場先行，全憑政府主導，口話同環境染污開戰，但政策往往左搖右擺。講完新能源汽車無耐，轉個頭又話二○二○年要全國採用乙醇汽油，已經即刻有專家質疑，製造乙醇唔單止耗費能源產生另一種污染問題，亦可能令糧食以至牲畜飼料價格急漲，到底最後行唔行得通？單睇消息下飆升的木薯資源（00841）股價輾轉由高位跌番三分之一，你話呢？

潔淨能源股炒得起，講到尾同近排個市火紅火綠，大部分股份估值相對落後，水向低流有關。如果內地真係要全面轉用電動車，以依家燃煤發電主導，生產的電力極其低效率同污染，車尾死氣喉唔噴二氧化碳，只係轉咗由電廠煙囪噴出嚟，所以唔搞好電力供應來源，增加可再生能源比例，甚至乎係核電，否則講乜都假。

古勝鍾情的光大國際（00257）、華能新能源（00958）及龍源電力（00916），幾時輪到佢哋發力就好難講，但依家個價有時間坐住，贏面大輸面細就幾肯定。

結算日大市見真章

個市無方向，上周初恒指挾一浸，隨即悶足幾日，上周五借標普調低中港評級，隊番229點收27,880點，一口氣補番上升裂口，維持行三步退兩步的慢牛姿態。

等新股資金鬆綁

唔知係咪大家怕咗金仔，逢周末嚟個大龍鳳的習慣有關。上周五大市主板成交縮番至926億元，炒得好哋哋的汽車股及內房股統統都要回。眾安在綫（06060）孖展上周五截飛，街到唱緊至少凍結兩千幾億元，難怪個市好似忽然乾塘咁款，今個星期四期指結算加埋眾安掛牌，資金鬆番出嚟，捱多兩日，後市係龍係蛇會見真章。

個市終於輪到光伏股發威，陽光能源（00757）上周五升18.6%，卡姆丹克太陽能（00712）則升5.7%，令人失望的保利協鑫能源（03800）一度升6.4%見1.16元創52周高之後，埋單倒跌1.8%。

公司伸手潮憂擴散

網龍（00777）伸手，先舊後新方式配股，每股售價介乎25.4至26.25元，集資近10億元，所得資金用於擴大網上教育的投資，配售價較上周五收市折讓4.02至7.12%。

近排個市兩萬八點頂住唔上唔落，網龍自預告中期業績虧轉盈，其股價由廿蚊邊起步炒到去34.35元，升幅超過七成，此時唔伸手還待何時！不過，公司攞錢，攞開就攞，升得太癲的破位股，好似資產負債表桿槓極高的內房股，短期真係要小心為宜。

港府新房屋政策陸續漏出風聲，劏房、貨櫃屋都可能變得合法，合法劏房大家仲係比較易明，貨櫃屋始終要地方安置，坐擁大量曬緊太陽、等待改變農地用途的發展商點同政府配合？貨櫃屋又會唔會為未來換地帶來契機？惹起唔少遐想。

美國話年底前再加多次息之後，隊過一浸的本地地產股，上周五見新世界發展（00017）已經能夠拗腰回升，另外兩隻農地大玩家新地（00016）同埋恒地（00012），睇嚟短期可以睇位再上車。

古勝