Market Insight：資源板塊藉業績突圍

水泥股方面，中國建材（03323）、中材股份（01893）及海螺水泥（00914）；煤炭股的中煤能源（01898）亦先後報捷，料上半年淨利潤大增。至於洛陽鉬業（03993）、中國鋁業（02600）及馬鞍山鋼鐵（00323），首季盈利已超過去年中期。不難預見，相關企業上半年業績將出現增長強勁的勢頭。

最能表達出市場睇法，自然係真金白銀，資金近期率先流入相關板塊部署，昨日多隻金屬資源股向上突圍，如五礦資源（01208）彈高6.3%，洛鉬則升4%，相關股份中短線升勢料可持續。

神華要睇位加注

策略上，過去品評過的江西銅業（00358）未來得及收集，經已先行踩油上，高位見過14.16元，收報13.82元，升4.7%，成交達7.31億元，主要係隔晚銅價升至兩年新高，中線睇15元目標不變。

此外，反而見到隻中國神華（01088）跌逾2%，若然落番18.5元邊，又係睇位上車或加注機會。

畏高食胡 無謂後悔

港股昨日開市無耐，指數就突破27,000點關口，可惜維持喺高位的時間不多，隨即出現回吐，一度倒跌，好在埋單恒指都升88點，收報26,941點，主板成交862億元。到底恒指見27,000點係升浪終點或是大升浪的新階段？反正呢一刻仲係未睇得好清，但好明顯回吐壓力暫有限，最好還是以靜制動，咪心急開新倉。

港股將進入業績公布期，唔少個股已經排定隊報喜，中國恒大（03333）預告截至今年六月底止中期，未經審核淨利潤同比將大幅上升三倍左右，主要受惠於期內集團交樓的物業平均售價顯著提升，以及集團完成全部永續債的贖回工作，股價昨日升穿20元關，高見21元，收報20.9元，升18%，成交達30.49億元。

大摩隨即順水推舟，出報告話預計恒大股價未來十五天將跑贏同業。老實講，呢隻股由一年低位4.73元升到21元，真係睇到股民眼定定，若喺股價升到上18元樓上覺畏高，先行食胡唔敢再揸都可以理解。所謂「賣仔莫摸頭」，呢段升幅就留番畀接貨者追逐吧！

金融股或更上一層樓

講番周三大市未能一舉破關，或多或少係因為資金等候美國聯儲局議息結果有關。不過，昨日早段金融股表現唔錯，維持近日強勢，但尾市升幅普遍收窄，其中友邦保險（01299）創60元新高，收報59.65元升1.1%，宏利金融（00945）及保誠（02378）亦先後破頂，收市分別升1.3%及1.2%。

滙控新高後要抖氣

至於周二尾市挾上的滙豐控股（00005）及渣打集團（02888）就相對失威，早段雖一度破頂，但之後就乏力再升，兩者最終分別跌0.2%及升0.2%。

雖然市場都預期美國議息將維持不變，但若然今日凌晨聯儲局議息會議透露出有關於倫媽會否連任的進一步訊息，或可減少市場對美國經濟前景的不明朗因素，對金融股仍是利多於弊，並有利金融股更上層樓，故今日不妨繼續留意金融股表現。

古勝