孖妹S檔案：跟美股隊長 玩盡場外交易

美OTC市場年成交萬五億

吳：投資書作家、「美股隊長」 吳瑞麟

彩兒：你嘅美股股齡有10年，究竟有啲乜係可以滿足我「新奇」、「有趣」、「又好玩」三個願望o架？

吳：你咪話你夏天掛住買衫裝身，搞到唔夠銀彈玩盡股市嘅，我有個方法係可以用少少錢就可以玩盡多國藍籌股，以至公司仔……嗱，就係美國OTC市場喇。場外交易意思係喺交易所外進行證券買賣嘅市場，係一啲無形、無固定嘅市場，好似我同朋友之間一買一賣，咁都算係OTC o架。

留意流通量 價差或拉闊

吳：美國OTC市場上市嘅股份，除咗一啲未合上市要求嘅小型公司、初創企業外，仲會有大量預託證券（ADR），係海外嘅大公司，例如任天堂（交易編號：NTDOY）、Louis Vuitton母公司LVMH（LVMUY）、Heineken（HEINY）、法國興業銀行（SCGLY）、軟銀（SFTBY）等等，甚至係香港股友追捧嘅股王騰訊（00700；TCEHY）都有上市，佢哋唔使做符合美國會計準則嘅財務報表，就可以喺當地OTC上市，所以呢個市場嘅規則當然比交易所鬆好多啦，但要留意流通量，差價或會闊啲，而且交投較疏亦令人用唔到技術分析揀股，所以要好熟行業同公司先適合參與市場。

Kitty：咁多壞處都仲有人玩，即係有吸引之處啦！睇番美國主要交易中介之一的OTC Markets數據，話截至一六年底，佢哋全年做咗1,930億美元（約15,054億港元）成交，都真係唔嘢小。

吳：美股其中一樣令人趨之若鶩嘅係，買一股都已可入場，以任天堂為例，如果買日股，每手100股，以上周股價約35,000日圓計，就要超過24萬港元先可以入場，若然係OTC市場只係約38美元（約296港元）就可做股東；以騰訊為例，以上周約270港元計，香港要27,000港元先買到一手，OTC市場只需34.28美元（約267港元）就買到一股。

遇不公事件可集體訴訟

吳：仲有呀，同一個交易時段就可以玩盡環球股票，又唔使將本金兌成多國貨幣，可以免卻麻煩同將外匯風險減低；而美國係有集體訴訟權，法制同香港唔同，當地小股東遇上不公平事件可以一齊告啲上市公司。

彩兒：你幾時開始喺美國OTC市場搵食，做過江龍咁威威？

吳：梗係唔係啦，當時係被迫開始o架，哈哈！喺5至6年前，當年我仲未完全用技術分析炒股，迷信「故事」題材，想博鈀金價格反彈，所以買入咗一間美國上市嘅鈀金公司，點知佢被交易所除咗牌，轉咗去OTC市場交易，最終都沽出股份，勁蝕！比較開心嘅一仗，就係趁任天堂嘅《Pokémon Go》熱潮買入股份，最終有逾兩成回報。

門檻低 自製組合分散風險

D：散戶 Daniel

Kitty：點解你有近在眼前嘅港股唔玩，偏偏要炒到去美國，仲要玩到咁刁鑽？

D：其實我股齡有20年，美股就係一四年炒到依家，當時就玩埋OTC市場。我舊年八月起做埋職業投資者，依家港股同美股投資組合倉位係一比一，港股係藍籌股居多，而美股因為市場深度夠，所以指數成分股以外嘅大價股都會揸。

D：我恒常嘅美股組合投入嘅本金有六位數字港元，組合一般會由20至30隻股份組成，由於美股可以一股股買，入場門檻低，所以先可以用呢個數額資金，都做到咁分散風險嘅效果，我每周都會參考StockCharts Technical Rank（SCTR）調整組合嘅，所以我都算係被動式咁參與OTC市場，而唔係旨在發掘明日之星。我今年都試過喺OTC市場買入騰訊，不過賺幅唔多，好快就沽出咗。

彩兒：點先玩到美國嘅OTC市場，其實皮費重唔重呢？聽聞你一踏足OTC市場，就有一個極為慘痛經歷？

「美股隊長」吳瑞麟指，美國OTC市場選擇多元化。（黃偉邦攝）	散戶Daniel在一四年開始參與美國OTC市場交易。（黃偉邦攝）	美國OTC市場種類繁多

美券商在港佣金廉宜

D：以往係做開IT嘢嘅，好鍾意喺網上搵資料做研究，唔怕網上做交易，不過要留意，美國OTC就唔係間間券商都有做，部分收費仲好貴添，我幫襯緊一間美國上市嘅券商，佢哋喺香港都有Office，交易費真係平絕全行，單邊佣金只係1美元（約7.8港元），OTC報價要另外每月畀3美元（約23港元）。

D：藍寶石水晶玻璃供應商極特先進科技（GTATQ）以前係蘋果公司（Apple Inc.）供應鏈之一，喺二○一四年，我買入咗佢，點知佢產品唔合規格，搞到Apple唔再同佢合作，最終破埋產，股價暴跌約九成，除牌後就轉咗去OTC交易，我記得買入時係幾十蚊美元，喺OTC賣出係得幾仙，真係一殼眼淚。

港人較熟悉新股場外交易

Kitty：其實港股嘅場外交易唔活躍，亦分開咗兩批市場，包括散戶場外交易同大戶嘅場外交易，目前散戶嘅場外交易多數喺證券行進行，交易類別以即將上市嘅新股為主，散戶最常用嘅新股場外交易中介包括耀才證券同輝立証券，新股喺上市前一日，可以透過呢類券商嘅暗盤交易，率先買入或沽售。

「黑池」屬大戶專享

彩兒：至於大戶呢，幾年前時興嘅係黑池交易（Dark Pool Trading），個名都型過人﹗所謂「黑池」，係指交易所以外大戶專用嘅場外交易平台，買賣雙方透過黑池交易，令其他經紀唔可以獲知盤路或身份等相關交易細節。黑池交易指令執行時間縮短，提升交易效率，所以受到投行和券商等機構客戶歡迎。不過，黑池交易透明度低，投資風險高，證監會已在一五年禁止散戶進行黑池交易。

大戶場外交易嘅例子，就好似停牌超過兩年嘅漢能薄膜發電（00566），前主席李河君喺一五年十二月喺場外以「賤價」每股0.18元人民幣，賣出漢能超過25億股，套現5.4億港元，出售價較公司停牌前3.91元，大幅折讓95.4%。

彩兒、Kitty

若有料報畀彩兒同Kitty或有嘢問，可電郵money.biz@on.cc