絲絲講場：日做逾10個鐘90後搞生意博乜?

無父幹更有壯志

調查發現，亞太地區嘅90後企業家相對現實，有45%人話創業主要目的係「增加個人財富」，比例較其他地區高，美國及歐洲分別只係40%及29%。咁樣諗嘅香港千禧代企業家仲多，佔咗56%，遠超區內平均數！驅動本地年輕人創業嘅其他主因仲有「改變生活方式」（52%）同「自己當家作主」（44%）。

亞太區嘅千禧世代企業家亦深明「力不到不為財」，每日平均工時達10.34個鐘（睇圖）；香港嘅更加勤力，平均做11.49個鐘，遠高於歐美嘅唔夠10粒鐘。

另一方面，無父幹嘅年輕人創業更有雄心壯志。調查發現，無家族生意背景嘅創業者作風較進取，訂立嘅每年營業收入增長目標平均為18%，較有家族生意背景嗰啲所訂嘅10%高。

講到實戰，只有16%及6%嘅「無父幹」創業者話，曾經分別因為領導能力問題及溝通技巧不足而遭受考驗，比例低過有家族生意背景嗰啲創業者（24%及21%）。

余絲韻