Market Insight：二線內房爆發力強

至於中國恒大（03333），由年初5元不到，昨升抵11.66元創52周新高，單日升幅亦逾一成半，成悶市中的亮點。大摩報告話，恒大一六至一七年的每股盈利複合年增長達56%，負債比率由去年底的4.3倍大降至今年底料為2.3倍，加上本月初管理層指第二輪策略投資目標，由原先的150億元人仔上調至300億元人仔，料可引發重估，故建議增持，目標價睇12元。獲摩笛祝福，難怪股價急升。

然而，古勝始終認為，在內地L形經濟之下，內房泡沫只會持續受控，未有爆破拖累金融體系穩定已是萬幸，未來政府可能容許部分競爭力不足的內房倒閉，以市場化加快推動行業汰弱留強，讓房價更有效反映市場供需關係。

至於選內房股，都係有阿爺支持的一線股中國海外（00688）同華潤置地（01109）會較穩陣。

講番恒大，除咗係摩笛發功，部分上升力量相信同空倉回補有關。若有持貨，呢浪升抵12元水平，別再錯失獲利機會；如冇貨在手，就最好做觀眾。

港股短線策略宜保守

美股連續四個交易日做好，到底「特式升市」係咪已屆尾聲，在下冇水晶球，但嚟緊六月聯儲局議息，加上半年結，最近美元走勢同美債息率表現都顯示後市不容過分樂觀，估計美股現水平未必好快跌好多，但料再升空間不大。

騰訊空軍頻頻出動

港股方面，天降黑雨，恒指全日波幅131點，恒指收報25,428點，升25點，主板成交僅700億元。股王騰訊（00700）連日調整，昨日一度低見269元，且沽空額連日高企，昨沽空額有9.21億元。

既然眼前正股表現和沽空情況都有所變化，短線博反彈要打醒十二分精神。

騰訊發軟蹄，港股就好似冇晒上升動力咁款，呢個並唔係好現象，亦反映反映港股短期再向上突破唔容易，整體策略宜轉保守，或適量減磅以降風險。

彩票股可小注短炒

穆迪下調中國信貸評級，其實舊年三月初穆迪將中國前景評級由「穩定」下調至「負面」，年多後才進一步下調中國主權評級。但中國財政部就唔多認同，話係高估咗中國經濟困難。到底邊個睇得啱，就讓事實去證明。

唔知大家有冇留意，最近中保監放寬內險資金投資重大工程，可能都預咗內企比較難向外舉債，所以針對某些環節放寬險資支援。之但係，中國主權評級被下調，唔多唔少都會影響內企借貸成本，對經濟發展唔係好事。呢個月滬綜指由近3,300點回至3,000點邊，若確認失守3,000點，相信好大機會係受累於次季經濟數據轉弱。

呢兩日本欄都有提及的彩票股，果然抖氣過後又再發力，中彩網通（08071）昨曾高見0.73元，原來呢隻股四月以來已累升逾五倍！第一視頻（00082）升7%，成交6,233萬元。古勝冇順風耳，唔知係咪有行業利好政策消息跟尾，只係純睇成交異動覺得有啲唔尋常，睇實交投小注短炒應該都搵到啖食。

古勝