Market Insight：石油股反彈可持續

若然能夠與周邊鄰國和平共處，共同發展的大戰略可取。香港人也應放下心理包袱，放眼四方，致力提升競爭力，配合區內的發展！

雖然呢個峰會前後，A股都冇咩起色，同過往有大政治活動例必有維穩力量支撐存在頗大落差，但這反而可以視為進步的表現，反映股市去槓桿化取得一定作用，動不動大上大落的大賭場作風已成過去。查實，嚟緊A股將第四次闖關，學上大人話齋，冇咗A股的國際指數都係唔完整的，睇吓今次係咪會有好消息。

國際市場方面，俄羅斯及沙特表態支持將石油減產協議延長至明年三月，擬減產的幅度則維持不變，消息刺激國際油價做好，油組與非油組成員國將於本月二十五日的部長級會議表決相關建議。

「三桶油」中，中石化（00386）以及中海油（00883）昨分別升3.2%及1.5%，中石油（00857）則微升0.2%。如果要博，古勝會傾向揀中石化，博油組會議前突破上月初高位6.57元，挑戰一五年六月高位6.8至6.9元水平。

想玩「美人輪」要睇定啲

金融市場產品多樣化，上周有輪商首推「美人輪」，係乜東東？美元兌離岸人民幣外匯窩輪是也。理論上，若然睇離岸人仔大趨勢會繼續貶值，可以留意美人認購證；相反，若睇離岸人仔會升值，則可留意美人認沽證。不過，推出初期投資者可能要時間了解玩法，加上呢期人仔匯率變動不大，所以都係睇多過做，但都可以當多個市場指標作參考。

寶勝試底 觀望為妙

再睇吓業績股，從事經營經銷體品業務的寶勝國際（03813），啱啱公布首季度業績，受到員工成本及租金開支增加拖累，純利按年減少27%至1.03億元人仔。受消息影響，股價昨急挫16%，收報1.56元。

其實，若有跟開呢隻股都應該記得，去年末季公司業績表現都令市場失望，主因季內大量開店及促銷，整合業務增加營運支出，以及薪金成本上升等。如今睇落今年以來情況還未見改善，故股價捱沽唔係冇原因。

畢竟短期內好難期望零售市道會有好大幅的增長，加上樓價高企，息口上升，勞工及租金開支大呢兩個問題，睇怕唔容易解決。喺見到業務持續一季復甦前，股價仍有機會反覆下試底部支持，還是觀望為妙。

順勢而行無謂估頂

港股方面，「一帶一路」概念股一如所料氣氛不差，但就未見有癲炒情況出現。好在藍籌表現唔曳，昨日合共有7隻藍籌股價創出52周新高。大笨象滙控（00005）近日股價動力強勁，古勝估計，滙控會係下一隻股價可以刷新52周高的藍籌。

落後藍籌隨時發力

受多隻藍籌股向好帶動，恒指昨日收報25,371點，升215點，主板成交812億元，表現比想像中好。有人會問，港股有咩條件再升上去？係咪應該加注淡倉？在下就認為，呢期A股咁弱，但港股照升，升得好哋哋，冇話咁心急去估頂。

尤其係呢期上衝的唔係靠一、兩隻藍籌，若然地產股接力，個市可能仲有幾百點去。若然對指數後市表現真係自問信心不足，可以嘗試調節吓心態，因應個股走勢行事，少理指數，咁會較容易做到投資決定。

古勝