絲絲講場：鷹君爭產疑雲激化！羅老太羅嘉瑞隔空對質

話說周日母親節，羅老太喺第二仔羅旭瑞旗下富豪酒店國際（00078）嘅銅鑼灣富豪酒店晚飯慶祝母親節，羅旭瑞以及另外四兄弟姊妹都有現身，但就唔見有「好想知媽媽去咗邊」嘅鷹君主席羅嘉瑞，聽講羅嘉瑞嗰朝早闖過上酒店想見羅老太。

母斥子質疑入稟「實為不孝」

羅嘉瑞尋日朝透過公關話，母親節嗰日佢終於見到媽媽，媽媽有兒孫探好開心但有啲感觸，仲話言談間媽媽想盡快返屋企。

羅老太致「嘉瑞」信件

羅嘉瑞認為母親信件內容非根據她意願而寫，他現無法與母親聯絡，相信母親已被隔離。

不過到下午，傳媒就收到相，見羅老太揸住封畀「嘉瑞」嘅信，信上老太話自己「頭腦十分清醒」，「這兩星期到一間酒店暫住，每天不用受到你們的煩擾。」又話羅嘉瑞喺傳媒面前質疑佢告滙豐信託嘅決定「實為不孝」，亦對其他兄弟姊妹不公平。

佢並要求羅嘉瑞「不要刻意歪曲事實，製造虛假輿論，損害我的名聲。」

羅嘉瑞：母信件受人誤導

尋晚就到羅嘉瑞一方公開發信，指母親封信內容無事實根據。羅嘉瑞嘅公開信提到，八三年鷹君陷入財政危機，羅嘉瑞臨危受命，棄醫從商，肩負挽救鷹君任務……經多年努力，將公司回復健康水平。

信中又指，羅嘉瑞向來孝順父母，一直堅持父親意願將鷹君發揚光大。佢作為家族信託嘅委託人及鷹君主席，須保障羅氏家族及集團全體利益。作為子女，佢一向侍母至孝，十分敬重母親，亦一直尊重母親意見，對於母親信件內容「感到極為痛心」。羅嘉瑞認為母親「信件內容並非根據母親真正意願而寫，懷疑受他人誤導」。

羅嘉瑞表示現時無法與母親聯絡，相信母親已被隔離，希望母親注意保重身體，能早日回家好好休息。

余絲韻