絲絲講場：周黑鴨主席化身攣毛仔
周黑鴨（01458）Logo嗰個攣毛仔，竟然係主席周富裕！絲絲聽佢哋員工講，老細年輕時真係一頭「攣毛」，點解依家變成光頭就唔知嘞。
公司點解叫「黑鴨」？原來有得解，係因為滷水鴨嘅蛋白質喺攤涼嘅過程，會因為氧化而變黑。
想行休閒食品路線
佢哋今日起開賣新產品麻辣小龍蝦，喺內地勁受歡迎，聽講舊年小龍蝦市場銷售額超過1,000億元人民幣（下同），人均消費84元，淨係武漢都每年消耗約1,500噸小龍蝦！
周主席話想將公司打造成休閒食品品牌，推出包裝小龍蝦，等大家跳出餐廳，仲送手套、濕紙巾同牙籤，等大家去邊都可以食。
余絲韻