絲絲講場：拆解銀紙4大謎團

謎團一：銀紙爛咗或崩咗一個角，仲用唔用得？

損壞咗嘅紙幣有可能唔被接受。如果崩咗角、污糟就仲用得，但最好都係拎返發鈔銀行回收。

一般嚟講，銀行會驗證張銀紙係咪真鈔、損毀面積有冇超過四分一、防偽特徵係咪完整，冇以上嘅問題就可以兌換番錢。

若閣下咁倒楣喺櫃員機撳到張冇咁忽嘅銀紙，唔該即刻度吓，夠四分三張就仲有救！聽講有人試過撳到張畀人剪晒四隻角嘅添……

二合一小心誤變偽鈔

謎團二：如果將兩張爛咗一半嘅銀紙黐埋做一張用，會點？

會畀差人拉囉！咁樣合成銀紙會被控製造偽鈔，坐得監。銀行職員驗鈔時，會檢查埋左右兩邊係咪有完整嘅相同鈔票號碼。

謎團三：香港有幾多張銀紙？

香港銀紙總發行量大約有廿幾億張，廿蚊紙佔最多，每一百張銀紙就有三十六張係廿蚊紙。

謎團四：除咗三間發鈔銀行外，仲有邊個可以發行紙幣？

你可以攞張十蚊紙睇睇，答案就喺上面，就係「香港特別行政區政府」！由二○○二年起，香港政府開始發行紫色設計嘅十蚊紙，政府只係發行十蚊紙同所有硬幣，其他面額嘅紙幣，就由三間發鈔銀行發行。

余絲韻