Market Insight：後向未明暫不宜瞓身

近排港股硬係古靈精怪，結算前成交唔特別旺，卻一浸浸咁升。昨日期指結算，好友大戶再下一城，恒指升120點報收24,698點，順利破近個幾月以來喺23,723至24,656點的橫行悶局。

不過，對周街唱26,000點之說，古勝暫時仲有多少保留。一來個市破位時間嚟得尷尬，期指大戶收割完，鳥獸散的可能仲未可完全抹殺，唔信睇友邦保險（01299）及騰訊（00700）昨分別貢獻恒指118點及34點，意味其餘48隻藍籌，實際跌緊32點。資金高度集中托住兩隻重磅股，再睇整體大市，插水股票有超過900隻，有多少托住指數散貨格。個市真突破定又係一次走勢陷阱，睇埋今日基金月結應該見真章。

科網股炒風續擴散

友邦同渣打集團（02888）一對基金股炒到爆之外，比較搶眼係炒騰訊熱錢繼續擴散到其他中資科網股。死死吓隻美圖（01357）翻生升5.7%，落到三月初10元邊的起步位又死唔去，似乎短期有機會炒番上13至14元蟹貨區樓下，啱晒膽生毛的股友。另網龍（00777）昨升3.6%，IGG（00799）及金山軟件（03888）同升2.5%。

中電穩健度仍吸引

既然古勝對短期走勢唔確定，都係想寫番啲穩陣嘢，兩電啱啱同港府重訂新利潤管制協議，准許回報降至8%。坊間大孖沙對公用股無乜興趣，故分析員着墨唔多，但在下見新協議為期15年，較現行「10+5」安排長，已值得留意。

表面上，准許回報降低對兩電短期不太有利，惟政府要增加低排的天然氣發電比例，未來大條道理增加固定投資，長遠計未必蝕底。

公用收息股，最緊要都係睇住街外的無風險利率高低，亦即係十年期美債孳息。美國「特式」升市有迹象告一段落，近排債息縮番落2.3厘有勢再往下走。

最啱收息積穀防老

反觀中電預計股息率今年有3.5厘，有十五年的新一份保障，其實82元樓下幾吸引，對承受唔起風險，不願擔驚受怕的投資者，中電依然是低息環境下的積穀防老佳選。

五月魔咒考驗股市

講番「侵侵」的稅改提案，包括簡化入息稅階由七檔改為三檔，取消遺產稅，企業稅率降至15%，同時採用「屬土制」徵稅，博美企增加國內投資同時將海外利潤匯回。簡單講，無論個人、企業及財閥世家，總之就人人有份永不落空。

政客派錢全民高興，尤其對上任後民望持續插水的「侵侵」，大條道理兌現選舉承諾，慷美國政府之慨。

事實上今日美國博彩公司盤口，賭狂人捱唔過四年任期賠率只得2.2倍，高過玩到尾1.75倍些少，但計落腳痛機會都有44%之高。以新科總統而言，幾受民眾愛戴可見一斑。

今次稅改未提及增加政府財政收入的配套，令人好奇成20萬億美元國債到晒頂的美國，孭住咁大筆街數，即使唔使本淨還息，未來錢從何來，財赤點算。

不過，經歷英國脫歐及美國大選，無嘢話唔得，「侵侵」稅改過唔過到國會，恕在下無預知未來水晶球，惟有交畀市場力量去決定。Sell in May前夕，如果道指升得破上次高位21,169點，咪信囉。

古勝