蒙牛乳業（02319）母公司中國蒙牛最近喺內地搞咗一項別開生面嘅體育活動，名為「蒙牛太空跑」，顧名思義，參加呢項體育活動嘅健兒咪要競跑到太空？
蒙牛方面形容，「蒙牛太空跑」由本月廿三日起，將先喺內地10個城市，即文昌、武漢、西安、哈爾濱、大連、成都、重慶、杭州、南京和南昌同時起跑。在每個活動現場，跑者都能通過電視大屏幕實時看到10城同跑嘅步數累積，萬人見證10城跑者共同挑戰38.4萬公里嘅「奔月計劃」。
哦，咁即係話「蒙牛太空跑」所競跑嘅太空係指月球。而月球距離我哋居住嘅地球剛好就係38.4萬公里嘞！蒙牛指，估計十個城市，每站3,000人以上同時起跑，預計當天完賽里程數累計突破38.4萬公里，最終一起完成「奔月計劃」。
另外，蒙牛搞呢個大型活動，仲配合虛擬實境（VR）科技，讓活動吸引力大增，仲都襯晒中國航天主題。好似喺每個城市跑場現場都會設有VR體驗區，而喺主會場嘅中國航天城，更會布置太空情景拍照區和互動區，同時在賽道中，跑者將跑進雲層，沖向太空，與7大行星近距離接觸。
余絲韻