絲絲講場：積金男神派「紅色炸彈」?
積金界男神、友邦強積金行政總裁馮裕祺（Stephen）要派帖？話說俗稱「懶人基金」嘅預設投資策略（DIS）唔經唔覺已推出接近一個月，強積金受託人今個月要分批向無任何投資指示嘅計劃成員，發出個名「水蛇春」咁長嘅「預設投資策略重新投資通知書」（DRN）。
強積金通知書要包裝
Stephen嘆謂，好多打工仔都唔會開強積金通知書嚟睇，仲話「依家DRN已經用粉紅色信封寄出，遲啲可能要用紅色，整到成張喜帖咁，先可以令打工仔有興趣望吓！」真係用心良苦。
同場嘅宏利人壽保險（國際）僱員福利業務部助理副總裁兼業務及產品發展部主管吳清發（Raymond）就話，希望再加強同成員之間嘅溝通。佢笑言，之前美國大選嗰陣，見到好多報道話希拉妮當選機會高，所以自己都將部分供款轉去美股基金。
冀與受託人積極溝通
點知投票當日，特朗普聲勢愈來愈浩大，Raymond嘆言，「睇住大選我個心都實埋」。事後佢問旗下員工，有無可能日後就住呢啲特別事件，向計劃成員做多少少積極溝通，「至少（受託人）攞到多啲同情分！」，希望日後可以再加強溝通咁話。
余絲韻