Market Insight：鐵路股趁低分注收集

五月十四至十五日，北京將舉行「一帶一路」國際合作高峰論壇，相信屆時「一帶一路」相關股份會有一番行情。趁最近A股疲弱，各個板塊都有不同程度調整，可以喺未來兩周留意喺呢個板塊低位承接，話唔定有低吸機會。

三隻鐵路基建股包括中國交通建設（01800）、中國鐵建（01186）及中國中鐵（00390）首季股價表現都不俗，其中以中交建表較突出。

踏入四月份三隻股份均現調整，論勢中鐵相對較弱，屬次選之列。至於中鐵建去年度EBIT略遜預期，股價仍受制於12至13元的重大阻力區，短線宜先觀察11元水平承接再作部署。

至於中交建，首季新簽合同增長佳，基本因素穩健，走勢上，可待回試10元邊承接再分注收集，博次季再衝12元關。

同一板塊中，昨日股價異動的有中國智能交通（01900），去年公司出售了高速公路及城市交通分部業務，以專注發展鐵路及民用航空分部業務。昨升13.2%報0.77元，股價異動，會唔係醞釀有新業務發展，不妨留意公司消息。

中海潤地長坐係首選

中國恒大（03333）本月十三日股價一度急挫至7.71元，惟即日又重上8.28元收市，繼後反覆向上。周二更創下52周新高9.32元，咁啱同日公司大老闆喺香港睇廣州恒大踢亞冠盃，恒大更以六比零大勝，真係雙喜臨門！

恒大密密出手回購

不過，昨日恒大股價現回吐壓力，收報8.7元，跌5.9%。翻查資料，上月底以來不時見到恒大的單日沽空股數逾千萬股，最多的就是股價大幅波動的十三號，沽空股數達3,250萬股。

再睇番公司通告，三月二十九日以來，公司有八個交易日在場內回購股份，其中四月十三日股價波動當天回購了2.02億股，再又在四月二十五日即股價創下52周新高當日回購了2.15億股，八個交易日合共回購了約6.7億股股份。到底呢個現象係好定唔好，留番畀小股東自己諗。

古勝只係擔心，如果沒有公司回購股份，其股價波動會否更大。基於呢個考慮，如果想中長線坐內房股，自問心血少啲，都係揀番兩隻打正阿爺旗號、表現又相對穩定的中國海外（00688）以及華潤置地（01109）入手會較為穩陣。

港股「殼」求從未減退

匯思太平洋（08147）昨日宣布股權易手，復牌後股價由停牌前的0.105元，最高見過0.265元，收報0.187元，升78%，成交6,185萬元。至於炒高理由，憧憬公司易手後業務發展有轉機當然係其一，另新主背景可能亦係關鍵。今次入主匯思太平洋的王良海，據通告講喺管理研發電子產品業務方面有豐富經驗，但其他介紹內容就唔多。

翻查資料顯示，呢位王良海英文譯名與同方友友（01868）的一位非執董相同，呢位仁兄做過清華同方的高層，專門負責多媒體產業及半導體與照明產業發展。咁匯思太平洋公布引入新主後，股價升得咁勁，唔知係咩同呢位新主的專業背景有關。

創板新股上市難度提高

自從證監會高調針對創板全配售新股股價大幅波動的問題後，針對審批創板新股亦趨嚴緊，新股上市難度高了，現存上市公司殼價自然更值錢，一旦獲北水睇中，身價飛升就更不在話下。想喺現成創板股揀蟀博燒冷灶，就睇你眼光夠唔夠準！

古勝