以後去日本玩，暢Yen定暢Bitcoin好？事關愈來愈多日本實體舖頭可以用電子貨幣比特幣（Bitcoin）找數，目前就大概有4,500家。
電器連鎖店BIC CAMERA，就同當地最大比特幣交易所bitFlyer合作。BIC CAMERA東京有樂町旗艦店，同埋Bicqlo（即是佢哋同UNIQLO共同營運嗰間）新宿東口店，尋日開始買衫買家電可用比特幣找數，結算上限暫定10萬日圓（約七千零蚊港紙）。
另一間Recruit Lifestyle目標係今年夏天，旗下26萬家食肆、零售舖可以畀客經手機或板腦用比特幣找數。今年七月起喺日本買虛擬貨幣唔使再畀消費稅！以後去日本玩改暢比特幣？價格波幅咁大，你諗你。
余絲韻