絲絲講場：鍾楚義千金自封為食宅女
經營中環著名蒲點Volar嘅高門集團（08412）尋日上市，主席吳繩祖胞弟吳承浚都有去，但絲絲望到眼都唔眨嘅，係公司主要股東資本策略（00497）主席鍾楚義千金鍾宛彤（Jasmine）。
Jasmine身穿全白短裙，用全白Hermès Birkin手袋，仲有對華倫天奴經典窩釘高踭鞋，全場至閃。現年廿五歲嘅Jasmine喺紐約讀完經濟學回流，喺滙豐做過一年，依家做緊基金相關嘅工作。
Jasmine最愛麻辣火鍋
問佢會唔會返爸爸公司幫手？佢竟然話自己係宅女！仲係個好為食嘅宅女，未來想搞吓飲食。由佢開嘅美食Instagram有成1.4萬個Followers，入面真係咩價位嘅美食都有。呢位「為食宅女」最鍾意食咩？竟然係麻辣火鍋！認真估佢唔到。
「宅女」原來前晚睇完時裝展，第二朝晨咁早去撐場，只為陪舅父仔（即係資本策略COO兼高門非執董簡士民）過嚟。
只揀Happy Friday去蒲
至於係咪夜蒲常客？「宅女」話Volar要到凌晨3、4點先會多人，時間太晏，所以佢只會揀Happy Friday先落去。
至於高門股價，尋日收報0.365元，較招股價0.34元，升7.35%。話時話，睇嚟絲絲要重新學習個「宅」字點解。
余絲韻