絲絲甚少睇電視，上周一睇就見到熟人，竟然見到富邦香港高級副總裁谷祖明（Stanley）被班細路圍。
實情係，被班小朋友圍住嚟採訪啫。只見甚少上電視嘅Stanley溫柔又有耐性咁解答小朋友嘅問題，但小朋友就唔同佢客氣。除咗必問「係咪谷德昭同谷祖琳親戚」外，有位小朋友有備而來，問Stanley有無諗過做金管局「主席」（睇嚟小朋友係想講「總裁」）。嘩！呢條問題真係出乎意料。Stanley讚佢問得好，有文有路。咁答案係咩呢？
一，Stanley同谷德昭、谷祖琳只係同鄉，都係山東威海人。二，佢無諗過做金管局「主席」，仲教小朋友個職位係公職，要政府委派o架！
余絲韻