孖妹S檔案：尾季打大風 買貨求穩陣

恒指22500成關鍵

黎：時富金融服務集團顧問　黎永良

彩兒：踏入第四季，我喺股場硬係覺得周身唔自在，有啲不祥預兆咁。

黎：我相信第四季市況會比較波動，我睇恒指之前上到24,300點已見頂，第四季有機會回落至22,500點，若呢個位守唔住，有機會下試更低位置。

時富黎永良表示，如果特朗普當選美國總統，市況可能波動到暈。（梁耀榮攝）	交銀劉振業稱，環球市況明年會跟今年差不多。（羅錦鴻攝）	多個金融領域年內向好

美國近期經濟數據唔錯，聯儲局好大機會喺十二月加息，呢個對股市有負面影響；美國共和黨總統候選人特朗普其實講出咗好多低下階層選民嘅心聲，呢班人拒絕畀傳統精英帶住走，若佢當選，個市可能波動到暈。

忍手避險 公用咪吼

另外，歐洲嘅難民問題令當地政治唔係好穩定，英國公布脫歐公投後，意大利將會喺十二月舉行憲法改革公投，西班牙嘅加泰羅尼亞自治區又計劃推動獨立公投，呢啲事件令歐洲市場變幻莫測，經濟增長存在好多隱憂。

Kitty：嘩，你講到第四季咁兇險，我哋應該點做好呀？

黎：我喺恒指上到24,300點嗰時，已將啲貨沽得七七八八，要避險最好就係唔好買嘢住，啲現金又唔會咬你嘅。即使係啲公用股，雖然回報穩定，但年內已升咗唔少，散戶唔應該喺依家呢個高位買。

彩兒：咩股都唔買好悶啫。

低吸ETF與大媽愛股

黎：咁個市又唔係完全冇利好因素嘅，人民幣被正式納入SDR（特別提款權）有利中國發展，深港通應該會喺今季開通，唔排除下一步A股會被納入MSCI新興市場指數。

深港通開通後，內地投資者可買入香港嘅中小型股份（恒生綜合中型股指數成分股及市值50億港元或以上的恒生綜合小型股指數成分股），投資者不妨趁跌市，買返啲大媽會炒嘅股份及A股ETF。另外，投資者可以喺中港兩地市場留意吓軍工、航天科技、人工智能、一帶一路、零售、醫藥及農業呢啲受惠國策嘅板塊。

中港地產股要留神

Kitty：咁有啲咩股份係特別有危機，應該掂都唔好掂呀？

黎：我覺得本地同內地嘅地產股都要小心。隨住美國加息步伐有機會加快，香港人供樓成本會上升，加上未來幾年香港嘅住宅供應會增加，本地經濟又唔係咁樂觀，失業率可能會上升，令樓價回落。中國依家嘅樓市就更加瘋狂，有人要假離婚去買樓，內地樓價未來有機會大幅調整。

避險有法 未算危機

劉：交通銀行香港分行環球金融市場部經濟及策略師　劉振業

彩兒：第四季有咁多大事發生，但你又好似唔係太驚喎。

劉：第四季的確有唔少風險，包括美國加息、美國總統大選及歐洲銀行問題等，但我又覺得好難稱得上係危機。美國加息都講咗幾年，新興市場過去一年對美國加息都冇咩反應；至於總統大選，即使特朗普當選，佢要幾個月後先上任，我又唔信佢上任後，可以好似佢之前咁講，即刻炒咗聯儲局主席耶倫喎。

歐洲方面，德銀目前問題跟○八年嘅雷曼兄弟有好大分別，當年係有結構性產品爆煲，德銀依家不過係面對美國過大罰款，呢個罰款金額最終或者可以降低。

黃金跌得多不妨入

至於英國脫歐，佢同其他歐盟國家嘅貿易優惠唔會一下子冇晒，啲金融機構亦唔會一下子撤出英國，脫歐對英國經濟嘅影響要好長時間先反映到出嚟。過去一段時間，大家對前景比較樂觀，第四季可能會轉為負面少少，波動性較大。

Kitty：如果想避險，唔通要買番幾舊金？不過，金價由七月頭1,375美元嘅高位，回落到依家得1,256.93美元，又唔似好安全喎。

劉：今季係有風險事件發酵，但應該唔會出現危機，我認為唔會有太多資金流去黃金、日圓呢啲傳統避險資產，佢哋仲分分鐘會轉頭回落。

黃金對美國貨幣政策好敏感，聯儲局好大機會喺今年十二月加息，利好美元，美元轉強或拖累金價。不過，若金價今季回落得多，都係買入時機，因始終預計明年美國加息步伐都係非常緩慢。

澳元Euro俱有錢景

另外，比起黃金及日圓，依家更少用美國國債去避險，始終美國息口趨勢向上，對國債價格係壞事。喺冇重大危機之下想平穩啲，可考慮買番啲收息股，好處係個市跌時，佢哋雖然都會跌，但起碼有息收，個市升時，佢哋亦會有升幅。

彩兒：咁除咗收息股外，仲有咩好買？

劉：外幣方面，可以考慮吓澳元，佢作為收息貨幣比紐元好，因澳洲經濟前景比較明朗，當地就業市場、消費近一年都復甦得幾好，澳洲儲備銀行減息速度應該會愈來愈慢，對澳元嚟講係好事，今季應該會做一個低位，可以慢慢買番上去。

另外，歐元都係一個選擇，雖然冇咩息收，但佢好在冇咩利淡因素，以往炒減息應該告一段落，因為歐洲經濟其實唔太差，GDP、製造業數據都慢慢行緊上去，速度係會慢啲，因歐元區有18個國家咁多。

分散投資 增持現金

Kitty：咁講法，為呢啲風險事件做準備，都有好多投資選擇喎。

劉：我相信環球市場下年會同今年差唔多，只不過主題轉咗，美國經濟及股市可能會回落，不過又未到危機。我覺得股市都係會繼續浮浮沉沉，升唔到上去係因經濟唔好，但資產價格好難似○八年咁大跌。港股依家市盈率得約12倍，之前最低都係8倍左右，跌幅有限，好多新興市場股市過去幾年已跌咗好多，未必仲會跌得好急，反而美國股市下跌幅度可能會大啲。

唔係話避險就一定要去買避險資產，香港人唔興呢樣嘢，可以盡量將手頭資產分散，以及將現金水平提高多少少，可能以前持有50%股票，依家就降到約20%，另外買多少少債券及商品，變做股、債、商品各三分之一，咁樣升市又唔會落後於人，跌市又有保護。

若有料報畀彩兒同Kitty或有嘢問，可電郵money.biz@on.cc

Kitty、彩兒