Market Insight：航運股未宜寄厚望

英國首相文翠珊，近排揚言明年三月啟動脫歐程序，被視為「硬脫歐」的姿態。上周英鎊隊到開巷，兌港元更失守10算關口。回帶睇番，金融海嘯以來，全球央行想盡辦法鬥印銀紙，就係望可以透過貶值，刺激通脹以及經濟復甦。今次英國脫歐談判都未開始，副作用大家有目共睹，鎊匯大跌引發英國股市升爆，FTSE輕鬆升穿7,000點關口。

內地大媽攞住一袋袋銀紙，趁十一長假期往英倫「濕平」，尚未見異動的英國樓市，古勝身邊幾位鍾愛磚頭的炒鬼，見匯水穿十算已見獵心起，準備去執平貨。在全球經濟十個茶壺三個蓋之下，果然爭相競貶，變相將經濟問題出口才是王道。

金軟得大媽歡心

望穿秋水終於加入SDR的人仔，唔知會唔會係下一波輪到佢玩貶值，身邊高人話人仔貶值係一七年重要投資課題，睇嚟機會真係唔少。

愈接近十一月深港通開車，啱內地炒家胃口的股份繼續見異動，深圳炒得最癲的要數資訊科技股莫屬。近排內地手機市場鬥到爛，向來高調的小米嚟個逆市擴張，話二○二○年要開至少1,000間零售店。睇嚟在智能手機市場開始飽和，唔可以再行飢餓行銷策略，小米開始走科技企業路線，亦要貼地啲，同華為、OPPO等打實體店市場，惟肯定錢會燒得更快。

話說回頭，近期小米的姊妹公司金山軟件（03888）走勢呈慢火煎魚，早排星展報告估金軟會是中國大媽南下掃貨之選，啱啱破位可以睇實。

中國海運集團及中遠集團合併重組舊年落實，上周再有新消息傳出，有指兩大集團計劃將11個造船廠合併。市靜之下，為兩大集團旗下在香港上市的四隻股份帶來刺激作用，中海集運（02866）及中國遠洋（01919）上周四分別升6%及4.8%，中遠海運港口（01199）及中海發展（01138）亦升逾3%。

大環境難有改善

市場曾經憧憬國企改革會為企業帶來新機遇，繼「南北車」之後，再有航運巨頭合併，但帶來的支持作用，無論係業績定股價上，都似乎未如預期。四隻股份舊年八月停牌，直至重組有定案，喺去年十二月復牌後，中遠海運港口及中海發展股價衝高回落。至於中海集運及中國遠洋，股價走勢相近，復牌後跌到今年二月，隨大市升一浸之後就回落，維持區間內橫行。

合併「神話」未奏效之餘，經營環境同樣無大改善，對整個行業亦有影響。航運業運力過剩，唔只係中國要面對的問題，而係全球都要面對，加上市道唔好，生意難做，故南韓最大航運企業韓進海運亦做唔住，早前宣布破產。

兩大集團合併目前未見大作用，但為咗避免喺大環境欠佳之下，仲自己人同自己人搶生意，再有業務整合亦都係好事，不過未宜抱太大期望。

古勝