絲絲講場：初創公司測美息快而準！

話說，聯儲局自一二年開始，佢哋嘅公開市場委員會（FOMC）每季開完議息會，都會公布最新經濟預測，當中包括FOMC十七位成員對未來息口預測嘅散點圖（Dot Plot），雖然無開名，但每人睇息口會去到幾多厘，十七個圓點一目了然。呢幅散點圖被市場視為息口去向指引，往往會引發金融市場反應。

電腦分析官員傾向

但有家叫Prattle嘅初創企業，竟然唔使等聯儲局開會，已經可以準確預測會後張散點圖個樣，即是估到息口預測中位數。嚴格講，唔係靠估，Prattle其實係用電腦程式，將議息會之前啲聯儲局官員嘅講話，按佢哋嘅口風有幾鷹（傾向收水）同有幾鴿（傾向放水）進行評分量化，製成散點圖。

聯儲局認被捉到路

Prattle張圖有幾堅？就連三藩市聯儲銀行啱啱個周二都出份文件講，仲將聯儲局一三年九月至一四年六月期間官員嘅息口預測圖，同Prattle喺嗰四次會議前數周所做嘅圖作對比，發現兩張圖嘅點點分布極似！

話時話，為免言論影響市場，聯儲局官員每次議息 前一周一向係禁止公開發言，但依家科技咁發達，睇嚟禁一周唔多夠。

余絲韻