絲絲講場:中資銀行搞協會騷團結

依家好多行業都鍾意自組協會,搞吓活動,加強吓凝聚力,估唔到近排一班喺香港嘅中資銀行都搞個「中資銀行業協會」,實行團結一番!

話說呢個協會由中銀香港(02388)、工銀亞洲、農行香港分行、建行亞洲、交銀香港,同國開行香港分行六間中資銀行組成,會員包括所有喺香港嘅中資銀行,首任會長就係中銀香港副董事長兼總裁岳毅。

想食住一帶一路條水

究竟協會未來有咩大計呢,仲未知住,但其中一個目標係想「發揮中資銀行喺服務一帶一路戰略中嘅積極作用」,都啱嘅,「一帶一路」呢輪咁Hit,間間銀行都吼住呢塊據說潛力極大嘅餅,好似滙豐之前都推出咗一系列相關廣告咁。

不過想了解多啲「中資銀行業協會」,都係要等下周一個成立酒會問吓阿岳總嘞。

余絲韻