創意新勢力：絕世好Post呃Like大生意

Bernie的個人事業一直離不開社交媒體，在學時修讀創意媒體，○○年科網股爆破時，他剛踏足社會，但未被嚇怕，「初期做過網頁編輯，幫公司諗喺網站推咩古仔先吸引人睇；其後又喺Yahoo幫跨國廣告客戶做宣傳工作，從未離開過科網行業。」他深信，從事科網行業的前途無可限量。

日日新橋 隨時突發

社交媒體講求創意。他指：「創意本來就係畀好多框框限制住，唔單指係預算開支，品牌形象、時、地、人統統要夾，惟有盡量發揮。剩得構思而實行唔到，都係無用。」

Bernie解釋：「我哋幫品牌度橋、影相、寫文字、出Post、睇顧客留言同反應等，咩都做晒。同傳統廣告商唔同，我哋要更頻密出Post，日日諗新橋。我哋無截稿時間，隨時有突發嘢。」他介紹公司過去製作：「如幫模型搞新意思，同Blogger一齊玩；又幫過某電台出自拍唱K App，利用手機上電視同歌星對唱等。」

他稱，「識玩facebook嘅人，唔代表識為公司出有質素嘅Post！」要滿足這些要求，對該公司的市場策略員或傳統廣告公司來說，都是一大挑戰；相反，Social Stand專做這些廣告，便更有優勢。

期望與客「互相傾慕」

要做到隨時候命，準備7乘24的長時間工作，更要做到高質素的網上廣告，Bernie指，熱愛工作是關鍵，「好似某連鎖店咁，我好鍾意飲佢啲咖啡，所以佢做到我個客，我又做到佢個客。我同啲同事講，若我要同賣殺蟲水嘅公司合作，我會盡量愛上用呢支殺蟲水！」

Bernie稱，他決定與某客戶合作前，會先花約一個月了解該公司產品、分析客戶在市場定位等，更會看他們過去在其他媒體登過的廣告，了解他們要求。

事實上，任何動態消息內容、影像等都不能馬虎，如他們試過為一個兒童品牌做facebook Post找來兒童心理學家，亦曾為一個運動品牌請來港隊教練。