你放出嚟啲二手iPhone會去晒邊？內地？未必，可能會係印度。
印度係僅次中國嘅全球第二大手機使用國，印度超過八成手機平過千一蚊港元，要打入印度市場，難免要定個「印度價格」或整個「印度版」。
Apple同小米搶當地市場，小米當地賣嘅新機，超過七成當地生產。咁Apple呢？Apple雖則Sell平，但就唔係靠最新推出嘅iPhone SE，而係打算靠賣二手iPhone殺出血路，希望打破佢哋當地得嗰唔夠2%市佔率宿命。
不過，Apple個如意算盤未必打得響，事關佢哋舊年申請進口二手iPhone入印度賣遭拒，早排再次申請，當地業界反對更激烈，理由係怕「製造電子垃圾」、「打擊本土智能手機生產商」、「違背鼓勵印度製造嘅國策」乜乜乜。
點解今次反對再激啲？話說印度新成立嘅電子製造業組織Mobile and Communications Council亦公開反對，仲質問政府點解進口汽車要面對300%關稅之際，仲要考慮批准進口二手機？該組織包括印度最大手機品牌好似Micromax、Intex、三星……咦？三星，明晒。
余絲韻