絲絲講場：財星圍飛煲燶億元橫財夢

連敬涵獻出「第一次」

話說，尋日尚乘資產管理連敬涵、智易東方藺常念、君陽金融鄧聲興、恒發金融林家亨、信誠證券王海翔、耀才證券郭思治、永豐金融涂國彬、鴻昇證券張益祖、國藝娛樂（08228）兼第一信用（08215）主席冼國林等人即場夾咗2,100蚊，誓要買個一億夢。

連敬涵話從未買過六合彩，今次都獻出自己嘅「第一次」，希望可以一擊即中。郭思治郭Sir話自己買親六合彩都無次中，不過見大家咁興致勃勃，當然夾埋一份。

就係咁，買六合彩嘅重任就交由藺常念負責，藺Sir亦飛身即刻「入市」。

嗱嗱嗱，睇到呢度，心水清嘅你大概已經發現，1億元金多寶其實係今日先接受投注，尋日買嘅，實情係今晚攪珠嘅六合彩，頭獎冇1億，只得1,300萬元！！！所以佢哋話，同投資一樣，啲嘢係要講啱時機嘅。

黃德几遲到 錯有錯着

尋日席上，有個人因為遲到而趕唔切參與發達大行動，呢位仁兄知道大家「偷步入市」之後飄飄然，話今日會買番大家嘅心水冧把，如果中咗成大贏家，到時捐一半做慈善，仲請埋大家食飯咁話。呢位仁兄就係金利豐黃德几，幾咁得戚！

余絲韻