絲絲講場：反骨伙記數教主7宗「最」
Apple教主喬布斯當年畀自己一手招攬入公司做CEO嘅斯考利（John Sculley）逼走，事迹已成「反骨」經典教材。但如果可以回到過去，斯考利話想同教主講好掛住佢，仲掛到喺教主離世嗰日成立咗間智能硬體公司，特登將公司命名為「Misfit」（特立獨行者咁解）。
「想成世賣糖水？定同我一齊改變世界？」喬布斯呢句，八三年就將斯考利由百事挖角到Apple；點知兩年後，喬布斯就畀人踢出Apple。
否認當年踢走喬布斯
上星期六嘅內地極客公園創新大會中，斯考利同創新工場董事長李開復回顧同教主嘅3年情，話佢哋「唔係普通合作夥伴咁簡單，而係死黨」，又話董事會當年唔應該逼教主走（即係唔關佢事），話自己根本唔想搶教主個位，佢仲數足教主有七樣嘢值得學習。真正「既抽水又勵志」，學嘢啦！
1、超級努力
查實教主幕後排練咗演講N次，每粒字都諗過度過，絕非隨口噏。
2、追求完美
設計Mac時，教主連密封喺機殼入面嘅主機板都要靚，工程師話「嗰度冇人睇到」，教主一句「我見到」，然後先有今日嘅Mac。
3、投入工作
教主投入工作犧牲私人生活，屋企基本冇乜家具，只有一張床、一盞燈、牆上有愛因斯坦與甘地嘅相，其他幾乎乜都冇。佢只在乎部Mac夠唔夠完美，其他嘢佢唔在乎。
4、充滿熱情
教主充滿熱情，唔係為咗錢而創業。
5、決不放棄
教主在乎嘅嘢，佢決不放棄。
6、不停學習
教主深信未來係多領域嘅結合，所以佢會學習好多唔同嘢，好似設計、書法、音樂製作、動漫，呢啲睇嚟好似同Apple無關，但後來都對公司有好大影響。
7、力招人才
原來當年教主親自打過電話畀李開復，咁啱李太接，結果李太都打動埋，爆畀教主知李開復當時斟緊微軟！
余絲韻