今日推介買波，「進攻贏票房，防守攞冠軍」，英超今季失球最少的是熱刺，現時只比榜首阿仙奴多失5分。如果相信預測，今季有77分就可以奪冠的話，熱刺現時有10倍以上應該十分值博。
和身邊波友分享，個個都潑冷水，理由是熱刺N年未攞個冠軍，當然是事實，可是以前的熱刺，要對住貨真價實的曼聯、曼城或者車路士，難得今年傳統勁旅齊齊大跌watt，是偷雞的大好機會，最重要是賠率合理。如果牌面高，就只會得四五倍，要好分便要接受有瑕疵。
買熱門要無可挑剔，買冷門則只須一個理由。賠率夠高，便可以接受較高的失敗機會，是賭錢原則101，可是一搬到股市，大家的心理預期卻是有贏硬的交易存在，以為必定有數得計，其實是一個錯誤的觀念。
股票價值不會跌到零，跌到近19,000點，博市況月底前轉穩，買一個短期Call，雖然是高風險，但只要潛在回報率夠高的話，豁出去博一博，絕對無傷大雅。
自己一年之內，交易的次數一定過萬次，出錯數目至少一半，可是長年累月以來還是有進帳，理由是賠率搭夠。
牌面機會率和價位根本同樣重要，可是太多人會被價位動力影響了判斷，又或者太過害怕失敗，以至不敢吼冷。
買短期Call和買熱刺win還有另一個好處，可以戒手痕，不用再場場密密賭，分分鐘即使最終是輸，也是除笨有精輸少很多。
豐盛金融資產管理董事 黃國英（作者為註冊持牌人士）