本來預咗中港股市昨日又要滑鐵廬，點知港股收市僅跌283點，萬九未失；滬綜指收市重上2,900點，報2,913點，升0.4%。不過，要嚟的始終會嚟，點都要試下啲大位承接，先至放心撈貨。
呢幾年上大人一直倡議要推動經濟轉型，別再做低端製造業，要為產業增值，要做大第三產業。誰知，社會發展有一定步驟、過程，根本沒有快車道，結果經濟升級轉型未到位，但整個廣東製造業猶如半死，尚未離場或倒閉的廠商多半是拿不出天價社保等賠償資金而被迫蝕住做，政府財政受壓。
國務院最近發放關於促進工貿易創新發展的若干意見，強調要繼續發展紡織服裝等勞工密集貿易產業，要穩定傳統優勢產業，算是因應問題作出修正，鼓勵創新改革與眼前勞工及政府利益取得平衡。
回說個股，舊年「一帶一路」、亞投行等概念炒得天咁高的鐵路股，一年唔夠股價經已打回原形。好似龍頭鐵路股中國中車（01766），去年四月股價炒到上20.65元，之後反覆回落，昨曾低見7元，即市反彈上7.37元收市，升2.65%，成交2.64億元。
走勢上，中車7元是一個較大的支持位，若然短線反彈過後又再失守此關，則後市繼續尋底的可能性頗大，不建議空手入白刃。
誠如瑞信早前所講，宏觀濟不利機車需求，去年中車海外新訂單僅40億美元，遠低於公司目標75億美元，加上新興市場貨幣波動，令海外訂單前景更不明朗，動車組在今年交付高峰過後亦恐怕無以為繼，城市軌道交通增長雖大但利潤率低，難完全抵銷前兩者增長放緩衝擊。可見股價弱勢有因，還是拋低「國策」二字，少做少錯！
‧人行決定對境外金融機構境內存放執行正常存款準備金率。
‧中銀監示警，MMM金融互助社區隱患極大，具有非法集資特徵。
‧去年十二月全國70大中城市新建商品住宅及二手住宅價格環比繼續上升。
司慕渢