孖妹Ｓ檔案：學全職炒家On Call 16小時
香港全民皆股，散戶一街都係，股友有冇幻想過自己有成為職業炒家嘅一日？着住睡衣喺屋企輕鬆賺幾球？孖妹蒲盡港九、新界魚缸，發現由普通散戶升呢做職業炒家嘅股友都有一啲共通點，首要係跌過、痛過都要唔怕死！以及要長時間（目及）實個市。不如睇吓以下三位職業炒家是如何煉成的？
投資組合「國際化」
P：全職炒家 Pasu
彩兒：你讀預科開始撳股票機，炒股路係咪一帆風順？
P：最初只係識上網睇新聞，完全唔識股票升跌原理，輸唔少利是錢！大學畢業後入咗銀行做前線Sales，接觸多咗投資產品，開始睇基金經理前瞻、銀行分析報告等，○六年買咗隻A股基金，翌年撞正大時代高位沽貨，持貨不足一年賺兩倍，其後辭工去考CFA（特許金融分析師）資歷同讀財務碩士。進修時試過迷信股王中移（00941），喺130元接貨，90元先肯沽，輸咗100萬元，令我深明止蝕嘅重要性。
○九年繼承父業返內地做廠，親身體驗內地製造業市道，熟悉國情，而且自己多咗用手機炒股，用App監測股票，亦開始衝出港股市場，炒埋美股，睇埋股票以外嘅投資工具。
不惜工本 持續進修
Kitty：你今年內炒股回報有1.1倍，當中有血有淚？
P：我年初起全職炒股，現時投資組合係30%美股、25%歐股、25%港股，另A股、日股及澳股共佔20%，由於係專業投資者，只要係幫到交易嘅都會不惜工本，早兩個月送咗份生日禮物畀自己，就係Bloomberg機，連同一啲訂閱，兩年使費近50萬元；為一旦連線有故障都有後備，又特意安裝兩間公司嘅寬頻線。股海學無止境，我會自製持續專業進修計劃，不時仲網購外國投資書自學。
近月主打運用Beta投資法，環球股市八月大跌市後反彈，我先沽空後撈底，靠蘋果公司（AAPL）同Tesla（TSLA）認沽期權食胡，現時持有facebook（FB）及阿里巴巴（BABA）正股；早前趁福士（德股：VOW）傳出醜聞於104歐元撈底，淨賺約80萬元。近期因應歐洲難民潮及量寬政策，預計當地建築及發展商將率先受惠，所以十月初喺78歐元買入Hochtief（德股：HOT），帳面賺逾一成。
輸光老婆本交學費
曾：元朗股神 曾錦安
彩兒：你有30年股齡，有乜風浪你未見過丫？
曾：最初炒股乜都唔識，只係向證券行散戶學習，喺八七年膽粗粗用兩萬幾蚊按金學人玩期指，點知撞正股災，當時傻到以為只會輸光兩萬幾蚊本金，點知係要輸凸，一日之間輸晒十幾萬老婆本！遇過呢一劫學精咗，九十年代初鑽研當時係新產品嘅期權，不過當然係不斷交學費先有今日嘅炒功啦，期權亦係我依家嘅好幫手！
○○年科網熱，我曾辭工全職炒股9個月，當年一月份，我喺一個朝早一次過買入80隻細價股，每隻注碼1.5萬元，炒股戶口喺大升市每日都升值十幾萬，可惜細價股股災一嚟，完全出唔切貨，好彩最終係打個和，執番身彩。
專揀業績差創板股
Kitty：我知道你每逢期指結算就會落證券行，不如分享吓期權炒技？
曾：今年經常外遊，錯失多次入市機會，尤其係大時代！期指結算落行係因為間中可以執死雞或感受市場氣氛，我試過一次買入原值150元嘅看好恒指末日期權，點知大市爆升400點，令期權價值勁升99倍！目前我持倉主要係20隻創業板股，大多係○八年持貨至今，普遍累升5至6倍，希望博大浪來臨時走貨。
我心目中「靚」嘅創業板股係要業績差、負債纍纍、官司纏身、主席走佬、有負面新聞，最好係貨源歸邊先易炒，但就要有耐性度過震倉。
上市通告股海尋寶
梁：專業投資者 梁帥聰（Clement）
Kitty：以我所知，你初入股壇交唔少學費喎。
梁：我大學畢業後係做電子商貿公司嘅市場推廣，只係聽同事講就買入股票純粹等升，完全冇股市機制概念，試過持貨兩日淨賺八千，○○年用大半副身家喺16元高追中國聯通（00762），跌到15元朋友叫我止蝕，但眼白白睇住佢跌到3元，最終坐足8年貨，好彩令我了解到股壇遊戲本質。
當時開始不斷睇書自學技術分析，亦開始報讀投資班了解人哋炒股取態，同時學睇上市公司年報，撞過好多次板之後發覺，業務賺唔賺錢反而唔難睇到，而公司發展前景先重要。例如要睇主席講嘅發展路向、公司虧損收窄或由虧轉盈主因係咪一次過的收益、會唔會簽咗重要訂單令增長有保證。
彩兒：我知你最叻就係從上市公司通告中「搵飯食」，究竟係點搵投資主題？
梁：我主要篩選自己大興趣板塊嘅通告睇，例如係互聯網+、電商、中港券商，跨太平洋戰略經濟夥伴關係協議（TPP）相關板塊嘅通告，亦會特別留意半新股上市後首份業績，如果上市費用冇對公司造成大影響，就會較睇好。此外，會揀預視公司動作、盈利預告、收購合併等反映契機嘅通告睇。
買入網龍賺近九成
我目前投資組合包括60%港股、40%A股，港股核心持倉有網龍（00777）、香港寬頻（01310）及科通芯城（00400）；A股主要持有恒生電子（600570.SH）及用友（600588.SH），今年較滿意一役係七月以數十萬元於13元買入網龍，之後喺24.25元沽貨，賺幅近九成。
若有料報畀彩兒同Kitty或有嘢問，可電郵money.biz@on.cc