Market Insight：炒國策股要識落車

美股隔晚單日轉向，埋單倒跌收場，返回萬七點樓上的道指，看來需要時間整固。昨港股低開兩百點後，有買賣兩閒之感，恒指跌160點報22,439點。賭美國加唔到息，息口敏感的地產股及領展（00823）表現比較好，反之肯德基在中國業務嗌緊救命，味千（00538）第三季內地同店銷售跌幅達9%，內需股無運行，紅股除淨後的蒙牛（02319）昨跌4.4%，百麗（01880）跌3.5%。

個市牛皮悶局，無古仔落鑊，資金賭月底召開的五中全會，以及即將公布的「十三五」規劃。正如阿媽係女人一樣，一定估中的新能源、光伏及環保行業均獲追捧。以過去經驗，相信會議結束前都仲有一浸升吓，但強如去年提出的「一帶一路」及「互聯網+」，都係喊完一輪口號後，唔使幾耐玩完。

中國喊口號式改革，轉身快的散戶及炒家，仲可以恃住身手敏捷快玩吓，但對於有特定時間持貨限制的基金，有幾多芬佬有興趣逐浪，古勝都有啲懷疑，無乜基本因素支持純炒作的，記住月底開完會前要識得落車。

內銀股只啱炒波幅

內銀股昨日幾近全線向下，上周末人行將信貸資產質押再貸款試點，由山東及廣東擴展至全國九個省市，被形容為中國版7萬億人仔的QE，在股市中卻雷聲大雨點小，君可見工行（01398）、建行（00939）兩隻內銀龍頭，消息曝光後，周一都見唔到上周五的今浪反彈高位，又再掉頭腳軟。毫無疑問，措施令銀行可以將國債、主權債以外，較高級別的資產拿去央行抵押，再套現拆借出街，變相有機會做多啲生意。

內地經濟失速，銀行近季壞帳一直攀升，即使抵押品上選擇多咗，惟驚貸款變爛帳，會有幾多銀行願意冒險擴大三農及小微企業貸款，實成疑問。依家內銀股估值係平，平均連一倍市帳率都冇，但芬佬實在搵唔到理由去博，一來不良貸款一兩季內應未見頂；其次，亦怕人行再嚟不對稱減息，搞到銀行息差壓力加大，短期內銀炒波幅無妨，想賭升幅就難少少。

蘋果公司近排都算黑仔，啱啱iPhone 6s爆出「晶片門事件」，同一款電話用三星同台積電兩間晶片公司產品，居然耗電量有分別，被捧場客群起攻之，蘋果公司最後都要出嚟解畫。昨日又畀美國法院判定，幾款產品未獲允許下使用屬於威斯康辛大學麥迪遜分校授權部門的技術，面臨最高8.62億美元的賠償。以蘋果公司律師團隊的身經百戰，相信最終可以大事化小，但彰顯美國國力的科技龍頭搞到倒瀉籮蟹，睇怕落到110美元邊的股價，短期仲未跌夠。

收息一族低買和電

影響所及，蘋果概念股之一，瑞聲（02018）早排50元頂到實，已級級落，富智康（02038）六月見過5元之後，近期亦有跟唔上資訊科技股反彈勢頭，昨收3.69元，較港股大時代之後低位3.31元，反彈一成一左右。早前估計，高息的兩隻電訊股和電香港（00215）及數碼通（00315），在美國加息幅度極為有限，蘋果公司又出新機下，應該有睇頭，結果只係估中一半。

和電半年成績表勁到爆，因為上一代大屏幕iPhone 6大賣，手機硬件收入大升所致，但以今代iPhone 6s氣氛明顯唔及上一代，業績有重估可能，近期股價無力，在3元邊徘徊應不無關係，以預計息率5厘左右，假如再插低啲的話，收息一族可以諗吓。

古勝