絲絲講場：董清世：分拆如生仔

信玻同阿仔分工清晰

話說，「阿媽」信義玻璃拆完又拆，二○一三年分拆咗「阿仔」信義光能出嚟，「阿媽」依家又準備拆香港汽車玻璃業務上市。於是有人就問，「阿仔」信義光能又有冇考慮分拆旗下嘅信義能源出嚟呢？可能呢排講創業板變「啤殼工廠」聽得多，個「殼」字上咗腦，個問題唔覺意講咗做分拆個「殼」！在場公關即刻話「唔係殼嚟嘅，有餡（o架）」，反應快到呢。

董清世仲盞鬼，佢話「未有女朋友，點生個仔出嚟呀？」，即是依家講分拆言之尚早咁解。嗱所以，「未有女朋友」嗰位，其實係信義光能。

話時話，信義玻璃同信義光能呢對母子，分工不嬲好分明。「阿媽」信義玻璃負責生產不同類型玻璃；「阿仔」信義光能就搞光伏玻璃同埋太陽能發電。不過舊年「阿媽」話要搞埋風能，唔通想撈過界，撈埋「阿仔」新能源個瓣？

董清世解畫話，其實係想信義光能專注做太陽能，而且股東淨資產少過信義玻璃一截，如果畀多啲嘢佢，驚有壓力咁話。哦，原來係驚「阿仔」無咁大個胃，食咁多嘢會滯。睇番兩母子今年嘅中期業績，「阿媽」信義玻璃總資產達223.55億元，而「阿仔」信義光能只得85.35億元，「阿媽」即係「阿媽」。

余絲韻