絲絲講場：男人點至算係成功？
究竟男人點叫成功？只要睇吓位男士點邀請佢伴侶去旅行，就已經分到高下。唔係絲絲講o架，係富邦香港高級副總裁兼消費金融部主管谷祖明（Stanley）教嘅。
Stanley話，「男友請你去巴黎旅行，可以講得出下星期即刻去，唔係儲錢下年先去，就算係個成功嘅真男人」。
谷祖明教巴黎旅程測試
嗱，聽嘢聽全套，咪知啲唔知啲。絕對唔係話一出嚟做嘢就咁，Stanley覺得人生去到四十歲先到黃金時期，年輕時人工有限，又唔可以隨便請假，咪去住離島玩幾日先囉。佢話，最緊要係學識理財同儲錢，到事業有成，可以自信豪氣兼唔肉痛咁同愛人伴侶講句「下星期請你去巴黎旅行」，就已經證明到自己有番咁上下財力同能力，可以稱得上係一個成功男人。
咁Stanley自己呢？佢Cool Cool哋只係講咗句「已經請咗老婆好幾次啦」，明晒。唔怪得絲絲有同事話，Stanley係銀行界嘅曉明寶寶。
麻甩老頂即刻煽動絲絲，用嚟試吓男友同老公（冇錯，係男友同老公，有幾出奇），睇過係咪超準咁話。
嗱，絲絲就咁睇嘅，Stanley都只算係講中咗一半，事關女士睇男士，除咗睇夠唔夠實力、豪氣同大方外，更加睇重對方願唔願意為自己花時間，仲要係Quality Time。即是，下星期請絲絲去巴黎，Fine；若然坐喺Les Deux Magot都仲掛住睇公司Email，咁就算吧啦，唔該立即返香港，絲絲請又點話。
余絲韻