絲絲講場：滙豐150蚊周二開炒

專家：首日去攞最賺

錢幣專家梁裕棋話，通常紀念鈔炒得起與否，視乎內地訂單數量，但近期內地炒家鍾意炒郵票，對滙豐紀念鈔好似「淡咗」；但另一位錢幣專家陳榮輝就話，內地熱炒郵票，對滙豐紀念鈔影響唔大。

兩位專家同樣認為，單張及3連張暗盤價可企穩喺1,000及4,000港元；至於35連張，梁話炒價或者會跌，陳就估計暗盤價大概40,000港元。

陳榮輝仲提醒話「如果係第一日去攞，個價就更好」，佢間店已接到訂單，部分暗盤交易更「收咗訂」，只等領鈔日取貨。

除咗一般錢幣店，網上討論區同facebook都有唔少紀念鈔群組，開出嘅暗盤價相差都幾大。有群組負責人話今次紀念鈔反應一般，只接到少量港澳客訂單，內地客冇乜幾多個，不過佢仍睇好今次，因為「始終係近年最後一套香港紀念鈔」。

啲facebook群組普遍只接受即場Cash交收，單張市價由600至2,000港元不等；3連張就介乎2,000至10,000元。至於35連張，有群組報價80,000港元，但亦有好幾個群組負責人話無訂單，仲講到明話怕「大家接受唔到個市價」，索性唔列出來嚟咁話。

淘寶35連張「癲」價

出價最「癲」嘅，都算係淘寶網入面。有35連張紀念鈔賣家開出「天價」108,000人仔，即折算約13萬港元，仲講明「六月九號取到、私讓、不議價、十號發出」；有幾個叫做稍為冇咁「癲」嘅35連張賣家，就開價80,000或88,888人仔。賣之前貨比三家，是常識吧。快部署吓。

領鈔當日必備

1.同結婚一樣，要親身，冇得搵人代

2.帶確認通知書

3.要帶身份證明文件（即香港身份證或護照）正本，一定要係你喺申請表上填嗰張

4.段估你都唔會打算摺啲紀念鈔啩？所以帶定個大啲嘅袋

5.若打算轉手賣，記得Keep住所有收據同原裝袋

保存紀念鈔貼士

1. 小心手汗同口水：紀念鈔一到手，千祈唔好你摸我又摸，事關手汗會玷污紀念鈔。大家圍埋一齊研究時，亦慎防口水四濺，總之要保持紀念鈔簇新乾淨。

2. 唔好放入衣櫃：衣櫃安全？連紀念鈔都擺入去？No No No，事關衣櫃內嘅臭丸同防潮防蟲用品，會令紀念鈔變黃。

3. 用報紙包外筒：咁究竟可以點保存？最簡單係放入防潮箱。冇防潮箱？其中一個經濟實惠嘅方法，就係用報紙包住個外筒（如有）收好佢。

余絲韻