Market Insight：醫藥股盈利有保證

港股好學唔學，將A股情緒化及過山車的即市特質照辦煮碗。昨日朝早先有深圳券商停為創板股提供借貸，再來向炒家徵收利得稅的傳聞，中港股市立即響起黑雨警告，十一點後半個鐘時間，恒指由27,781點殺到落27,094點，其後A股強力反彈，港股都跟唔上，最終跌105點報27,551點。

債王言論留有後路

昨日另一焦點是「債王」格羅斯撈過界，公開在Twitter唱淡中國股市，認為下一個千載難逢搵銀黃金機會正係沽空深圳股票指數。理據係深成指市盈率高達74.5倍，遠遠高於滬綜指。面對中國出口持續放緩，人民幣對亞洲其他國家競爭優勢漸失，根本唔足以支撐現時估值。

老實講，以格羅斯級數的國際炒家，實在無乜必要喺重倉出擊前大鑼大鼓驚死無人跟。睇番佢老哥去年黯然離開當了生招牌多年的Pimco，加入Janus後其管理基金表現唔算標青，外界大有英雄遲暮之嘆。今時今日，A股兩市成交屢破世界紀錄，滬綜指雖然未見六千二，但第一身感受今浪肯定勁過○七年牛市三期。

在外資舉棋不定之際，格羅斯公然唱反調，要知金融市場向來以善忘而馳名，尤其老江湖更加睇得通透，睇錯市，尤其並非佢專長的市場，唔會有人記住，萬一畀佢開口中，一鋪過乜名氣都番晒嚟。

若然心水清的，應該留意到債王都帶定頭盔，口裏話準備沽空深指，在出擊時機上卻強調「不是現在」。要知股市無可能四十五度角長期向上，遲早有一日會受地心吸力影響撻番落嚟，到底三個月抑或六個月都好，到時債王多少都賺到credit，完全係「公佢贏、字你輸」嗰隻。

大媽錢易搵，富力（02777）返去發A股之後，比亞迪（01211）亦以折讓24%，每股57.4元人仔發A股集資150億人仔，H股股價昨創52周高位，升8.8%收報59.3元。反觀幾隻在香港伸手要錢的就無咁醒神，阿里影業（01060）、金山軟件（03888）及瑞年（02010）全部要跌，雖然無一隻穿配售價，但睇見統統折讓咁大配股，有貨在手的捧場客肯定唔好受。

阿里進軍線上銷售

中國跨過人口紅利門檻，人口老化情況漸浮現。近年政府大力推動醫療改革，基於中國人均醫療保健開支相對偏低，例如與金磚國的巴西相比，還不及三分之一，與發達國家比較更是差天共地，故過去幾年醫療保健市場，成為經濟冷風下不受影響產業之一。

今年兩個最具備資本優勢的雙馬系統，吼到實醫療保健市場。阿里巴巴透過阿里健康（00241），完成195億元歷史性的天價醫療收購，購入天貓的醫藥線上銷售平台，一下子成為相關領域的龍頭。

內地線上醫藥銷售，仍處於起步階段，家陣阿里健康不過對投資者銷售未來發展的藍圖，對比盈利能力，暫時仍難與在地的醫療服務相比。復星醫藥（02196）是中國大型醫療保健綜合企業之一，本身擁有研發及生產藥品技術之外，也開發及產銷醫療設備，今年積極進軍醫院的營運及管理。

復藥吼位持中長線

復藥於年初與齊齊哈爾市第一醫院簽訂投資合作框架協議，共同出資成立新醫院，亦與溫州市中醫院訂合作框架協議書，設立老年病醫院，本月初與玉林市醫療集團簽訂《合作框架協議》，首次涉獵公營醫院業務。據分析員估計，玉林市項目未來四至五年可以提供7,500萬至8,000萬元人仔盈利貢獻。

取消藥品限價，支持明後兩年年增長率兩成，較一三及一四年改善，今年首季復藥歸屬上市股東的應佔淨利潤增29%至5.36億元人仔，增幅比去年同期17.6%更見加快，綜合預測全年盈利24.1億元人仔，一五年市盈率24倍，估值合理，假如短期市況波動下能夠回到30元附近，中長線回報更理想。

升逾兩成

桃桃於五月二十七日推介重慶鋼鐵（01053），當日股價低見2.37元，其後略作整固後發力再上，以高低位計累升22%!

古勝