絲絲講場：「鼠戰中環」街Game過鼠癮
喺中環核心區域跑來跑去嘅「鼠戰中環」慈善籌款活動，今年已經玩咗十年，仲未玩過？點都應該聽過。真係未聽過又想知係乜？得得得，大會今年喺交易廣場中央大廳擺咗個活動圖片展，畀大家感受吓「鼠戰中環」嘅氣氛，仲有兩個「街Game」畀你試吓做鼠鼠嘅滋味。
呢兩個「街Game」，一個係「大鼠輪」，就當自己係鼠鼠咁喺個「轆」入面搏命跑；至於第二個就係「捕鼠器」，要瞓喺到「摩打手」不停推起捕鼠器個「夾」。
想挑戰吓手同腳嘅極限？呢兩款Game開始咗喇，擺到今個月二十三號。不過先此聲明，唔係個個畀玩，要16歲以上，仲要夠1.5米高。
余絲韻