絲絲講場：卅歲前想做CEO靠3招

第1招：搵啱拍檔補己不足

搵拍檔，搵啱晒Key嘅兄弟姊妹？錯。千祈唔好搵同自己似到十足十嗰啲，否則就無人挑戰自己嘅諗法同決定；各有所長可互補不足，咁先可以幫到公司發展。

好似Facebook朱仔搞件產品就叻，商業運作未必在行，佢於是就搵咗個熟悉商業運作嘅桑德伯格嚟做營運總監，拍住上令Facebook愈做愈大。

汪滔

佩奇

第2招：放膽去搏要識Sell橋

廿幾歲嘅人生，除咗失戀，照計無乜創傷同負擔，所以創業就要放膽搏盡，唔通等有仔有女仲要供緊層樓先嚟搏？好似大疆位汪滔，讀緊科大時開發咗套直升機飛行控制系統，為咗咁走堂兼捱夜，結果得科大教授李澤湘賞識，投資埋大疆。

同樣，得嗰廿幾歲，都應該冇乜往績可以畀投資者睇。不過唔使灰，要堅持，只要搵到第一個投資者肯聽你Sell條橋，機會就嚟。尤其係科技界嘅創投基金，好多都會畀啲後生仔搏一鋪，之後就記得好似Google兩位哥仔佩奇同布林，搵個經驗豐富嘅阿叔施密特過檔幫手。

第3招：首要謙虛一心要贏

想贏，先要夠謙虛，點謙虛？即是他人嘅意見要聽入耳，呢樣係做領袖嘅必要條件。有其他人做得比自己好，就要放手畀人搞；公司做得好，千祈咪懶醒，要Keep住問自己「依家條路行得啱唔啱」，就連Facebook朱克伯格亦幾乎日日問自己「到底我依家係咪做緊最重要嘅嘢」。

但緊記，謙虛唔等於禮讓，做得一間公司嘅CEO，幾時都要將個「贏」字放喺心，咁先可以帶領公司發圍。

嗱！呢三招，話易唔易，話難唔難，30歲前做唔做得到？睇你自己修為。都係嗰句：時間無多。

余絲韻