內地富戶喜愛到世界各地購物，但投資習慣就唔多「國際化」，連投資信仰都傾向傳統「Cash is King」。
嘉信理財與清華大學舊年合作搞嘅「中國城市內新興富裕投資者研究」昨日出爐，結果顯示，超過80%內地富戶仍停留喺內地投資，89%最愛「揸」現金，仲要80%都會買磚頭。調查又發現，34%受訪富戶都唔多信理財顧問。
嘉信理財同清華大學舊年年中訪問咗714位上海、北京的投資者，家庭年收入約4萬至80萬美元，兼擁有100萬美元以內嘅可投資資產。不過，內地富戶理財都親力親為，因有34%受訪者都唔多信理財顧問。投資前若要做功課，有43%受訪者仲用緊傳統資訊途徑包括報紙，遠高於微博和微信、網誌和論壇等電子途徑。雖然家陣內地互聯網看似發達，但只有37%受訪富戶經網上投資咋。
嘉信理財國際服務及特別業務拓展部執行副總裁Lisa Kidd Hunt就話，約83%受訪者只在內地投資，在存款以外資產類別中，亦以中、港股票投資較受歡迎。所以內地富戶在多元化財務投資進程，尤其是其他投資工具、內地以外的地區投資上，有待改善。
余絲韻