絲絲講場：巴郡「出名」闖歐亞搞地產
股神巴菲特嘅投資旗艦「巴郡」（Berkshire），喺投資界無人唔識，直情係金漆招牌，唔知係咪用得唔好嘥，據聞會授權畀歐洲同亞洲嘅地產經紀業務公司用呢個名，相信唔少人有興趣爭住同佢做拍乸呢！
據聞股神一早有呢個想法，早於二○一一年，佢喺致股東公開信中就咁寫到：「將商品買入，然後以品牌包裝出售，一直是生意成功嘅方程式。」
字號代表誠信穩定
有品牌顧問就話，正如布蘭森創辦嘅維珍代表反叛；蘋果公司在已故教主喬布斯成為了完美的代名詞；巴郡只會投資佢哋認識兼家喻戶曉企業，好似國際商業機器（IBM）、可口可樂，因此巴郡個名包含了信任、穩定及誠信。
近年旗下統一改名
其實股神唔少生意亦開始打正旗號用巴郡嗰名嚟經營，當中今年重組嘅電力業務，中美能源同PacifiCorp合併後易名做巴郡能源。
最近巴郡收購美國第五大汽車經紀商Van Tuyl時就話明，之後會改名Berkshire Hathaway Automotive。
至於美國以Berkshire Hathaway HomeServices品牌嘅地產經紀商到出年春天就將增加到近1,400家。
余絲韻