絲絲講場：恒生便服日大搞慈善

絲絲逢周五約賓架食飯感覺都會開心啲，除咗就嚟放假之外，一般都會着得比較簡單輕鬆，綠色銀行恒生（00011）就用便服日嚟做善事切入點，做埋籌款，今年用「健康生活」做主題，管理層兼職做埋平面模特兒，幫手做宣傳。

恒生做善事次次都好齊人，今次當然都係副董事長兼行政總裁李慧敏（Rose）帶頭，財務總監、零售、企業銀行阿頭全程支持，一齊上鏡做Model應該夠晒號召力，仲要揀埋總行三樓戶外草地做場景，絲絲聽聞呢排好多財金界人士發現，坐喺露天嘅地下食飯心曠神怡，恒生都可以考慮吓開放草地畀員工野餐啦。

言歸正傳，搞個便服日，恒生會捐幾多錢？原來佢哋跟市場原則，員工籌到幾多，恒生會捐同等金額，即係大家落力啲跑數，善事效果自動雙計，怪唔得之上年剩係便服日都總共捐咗超過100萬元，今年再爆數就更好！

余絲韻