絲絲講場：科企發動機械人爭霸戰

亞馬遜同Google呢兩間科技龍頭爭住趕上科研潮流尖端，仲爆發機械人競賽！Google啱啱宣布完成收購叫Boston Dynamics嘅機械人研發商，呢間公司來頭真大，專做美國國防部生意，幾年前已推出兩腳同埋四腳行走嘅機械「動物」！

亞馬遜吼準借助機械人提升業務自動化的商機，上年買咗機械人公司Kiva Systems，將倉庫交付中心自動化後，依家籌備用無人飛機送貨。

勁敵Google當然不甘示弱，呢半年係咁將機械人公司收歸旗下，華府御用嘅Boston Dynamics係第八間。

Boston Dynamics成立咗超過廿年，旗下機械人一直不售予商業用途，只係早年幫索尼（Sony）推出機械狗Aibo畀過意見，不過經典作Big Dog係無頭嘅四腳機械爬爬，唔少網民喺YouTube睇完都話似《未來戰士》電影裏面嘅邪惡機械殺手，睇嚟要包裝吓至可以喺商用市場發圍。

外界預期，Google買咗咁多機械人技術返嚟後，嚟緊呢幾年會將機械人推向商業以至消費者層面，例如好似亞馬遜自家用緊嘅自動倉儲，仲有包裝付運，甚至長者護理添！

余詩韻