絲絲講場:復星郭總挺身反擊造謠

科技愈來愈發達,依家唔少消息喺網上唔使一陣就傳開晒,尋日就有傳話復星集團董事長郭廣昌,正接受調查,仲喺香港被限制離境,搞到系內上市公司復星國際(00656)同復星醫藥(02196)股價尋日齊齊急跌,復星同郭廣昌見勢即時通過唔同渠道澄清事件,話呢啲傳聞純屬謠言,唔排除有機構做空復星牟利。

絲絲聽講,郭廣昌今次勁嬲,仲爆晒粗,話要採取一切法律手段,徹查到底,唔會畀「作惡者」得逞咁話!

其實都唔怪得郭廣昌咁嬲嘅,聽講呢個消息前日已經開始流傳,咁啱郭廣昌個微博畀人清空咗,大家當然驚發生事,搞到尋日一開市,復星國際同復星醫藥分別最多跌7%同12%,復星醫藥A股亦幾乎跌停。

股價急挫 怒斥「空軍」

大拿拿無咗幾十億市值,復星即時又發聲明、又喺微博多個渠道澄清,而郭廣昌亦喺中午出嚟回應話,因為之前復星國際發可換股債券,所以有人故意做空股票,佢話:「這個時候,用謠言嘅方式做空我們股票賺錢,這是很惡劣嘅方式,我們要堅決打擊」。

「我們不能讓造謠者賺到錢,不能讓造謠者得逞,這不僅是為復星澄清,更要讓投資者利益得到保證」,郭廣昌仲爆粗話做呢種事嘅人好貪心,仲想賺更多錢!

復星就喺微博度,放咗張郭廣昌喺尋日朝早同大唐集團就合作事項溝通嘅相,力證謠言不實,所以下晝開市,復星國際同復星醫藥兩隻股份反彈番,不過收市都係分別跌4.30%同5.73%,市值分別蒸發咗20.54億同3.96億!

余絲韻