近排科網股炒到飛起，喺美國納市掛牌嘅中文搜索引擎龍頭百度，由年頭到依家股價已經飛升咗六成三，帶挈創辦人李彥宏財富都急升到去119億美元。
根據最新嘅「彭博億萬富翁指數」，佢嘅淨身價已經一舉超越咗哇哈哈集團董事長宗慶后，喺中國富豪榜上僅次於萬達集團董事長王健林，排喺第二位。
本港富豪榜成員一向穩定，尤其喺頭幾位嘅富豪，年年排名相差無幾。相比之下，內地首富就「短命」得多，好似福布斯中國富豪榜咁，喺最近八年已經換咗七個首富。
李彥宏喺一個月前公布嘅福布斯中國富豪榜上，就仲排緊第三位，但係如果根據每日按市場價值更新嘅「彭博億萬富翁指數」，佢嘅身家喺今個禮拜二已經升咗上第二位。
其實百度今年股價急升，除咗因為科網股當炒之外，公司業務發展理想都係一個重要嘅原因。
喺PC加移動搜索市佔率繼續大幅拋離內地同業之餘，百度尋日宣布，聯合華閱數碼推出第一款接入百度個人雲嘅小型家庭醫療設備「MUMU智能血壓計」，業務相當多元化。